Дар Душанбе ҷаласаи 5-уми прокурорҳои генералии давлатҳои аъзои Созмони ҳамкории иқтисодӣ баргузор шуд

Май 16, 2024 19:43

ДУШАНБЕ, 16.05.2024 /АМИТ «Ховар»/. Имрӯз дар шаҳри Душанбе ҷаласаи 5-уми прокурорҳои генералии давлатҳои аъзои Созмони ҳамкории иқтисодӣ (СҲИ) баргузор гардид. Дар ин хусус ба АМИТ «Ховар» дар Прокуратураи генералии Ҷумҳурии Тоҷикистон хабар доданд.

Дар кори ҷаласа Прокурори генералии Ҷумҳурии Озарбойҷон Комрон Алиев, Прокурори генералии Ҷумҳурии Исломии Эрон Муҳаммад Муваҳҳидӣ-Озод, Прокурори генералии Ҷумҳурии Қазоқистон Берик Асилов, муовини аввали Прокурори генералии Ҷумҳурии Қирғизистон Улукбек Султанов, муовини Прокурори Ҷумҳурии Исломии Покистон Рашидин Наваз Касурӣ, Прокурори генералии Суди олии аппелятсионии Ҷумҳурии Туркия Бекир Шаҳин, муовини Прокурори генералии Туркманистон Алланазар Ниязлиев, Прокурори генералии Ҷумҳурии Узбекистон Нигматилло Юлдошев, Котиби генералии Созмони ҳамкории иқтисодӣ Хусрав Нозирӣ ва ба ҳайси меҳмони фахрӣ Прокурори генералии Подшоҳии Арабистони Саудӣ Сауд ибни Абдуллоҳ Ал-Муъҷиб иштирок намуданд.

Иштирокдорони ҷаласа масъалаҳои вобаста ба ҷиноятҳои фаромиллии муташаккилро мавриди муҳокима қарор дода, таъкид намуданд, ки барои муборизаи беамон ба муқобили ин таҳдиду хатарҳои мураккаб ва торафт афзоянда зарур аст, ки ҳамкории ҳуқуқӣ байни сохторҳои судӣ тақвият дода, роҳҳои расонидани кумакҳои ҳуқуқӣ васеъ карда шаванд.

Вобаста ба натиҷаҳои ҷаласа Декларатсияи Душанбе қабул карда шуд, ки дар он қарори иштирокдорони ҷаласаи 5-уми прокурорҳои генералии давлатҳои аъзои Созмони ҳамкории иқтисодӣ оид ба мусоидат баҳри тақвияти ҳамкорӣ байни давлатҳои аъзои Созмони ҳамкории иқтисодӣ дар соҳаи ниҳоят муҳим, муборизаи устуворона бар зидди ҷинояткории фаромиллии муташаккил, дар сатҳи минтақа бештар намудани талошҳо ва қатъияти давлатҳои аъзои Созмони ҳамкории иқтисодӣ баҳри бартараф намудан ва кам кардани таҳдиду хатарҳои ҷинояткории фаромиллии муташаккил инъикос ёфтааст.

Нақшаи ҳамкорӣ байни прокурорҳои генералии давлатҳои аъзои Созмони ҳамкории иқтисодӣ тасдиқ карда шуд. Иштирокдорони ҷаласа таъкид намуданд, ки Нақшаи ҳамкорӣ ба таври самарабахш ва амалан иҷро карда шавад.

Қарор қабул карда шуд, ки ҷаласаҳои прокурорҳои давлатҳои аъзои Созмони ҳамкории иқтисодӣ мунтазам баргузор карда шаванд. Баҳри тақвияти ҳамкории ҳуқуқӣ байни давлатҳои аъзои Созмони ҳамкории иқтисодӣ шароити мусоид фароҳам оварда шавад. Оид ба табодули мутахассисон, шароит ва имконият барои такмили ихтисоси кормандони соҳа ва мутасаддиёне, ки ба мубориза ба гардиши ғайриқонунии маводи мухаддир, терроризм ва ҷинояткории фаромиллии муташаккил ҷалб шудаанд, изҳори назар карда шуд. Қарор карда шуд, ки ба Котиботи Созмон вобаста ба лоиҳаҳои илмӣ-таҳқиқотӣ байни марказҳои омодасозии мутахассисони касбии прокуратураҳои генералӣ таклифу пешниҳод карда шавад.

Баъд аз анҷоми ҷаласа мулоқоти дуҷонибаи прокурорҳои генералӣ ва роҳбарони ҳайатҳои давлатҳои аъзои Созмони ҳамкории иқтисодӣ баргузор гардида, масъалаҳои муҳими ҳамкории дуҷониба баррасӣ шуданд.

Акрам САНГЗОДА,
АМИТ Ховар

Май 16, 2024 19:43

Хабарҳои дигари ин бахш

Котиби Шурои амнияти Тоҷикистон Юсуф Раҳмон бо Котиби давлатии Шурои амнияти Ҷумҳурии Беларус Александр Волфович мулоқот намуд
Котиби Шурои амнияти Тоҷикистон бо Мушовири Шурои амнияти миллии Ҷумҳурии Ироқ мулоқот намуд
Дар вилояти Хатлон 128 ҳодисаи садамавии роҳу нақлиёт ба қайд гирифта шуд
Дар ҷаласаи Шурои вазирони мудофиаи давлатҳои аъзои СААД ҳамкорӣ дар соҳаи ҳарбӣ баррасӣ карда шуд
Котиби Шурои амнияти Тоҷикистон дар Вохӯрии 13-уми байналмилалии намояндагони баландмақоми бахши амният иштирок намуд
Аз 29 то 31 май дар Душанбе ҳаракати воситаҳои нақлиёт муваққатан маҳдуд карда мешавад
«ЗАМИН», «МАРЗ» ВА «ВАТАН» — УНСУРҲОИ МУҚАДДАС ВА ҲАЁТАН МУҲИМ. Ба Рӯзи Қӯшунҳои сарҳадӣ бахшида мешавад
Дар Бадахшон 31-солагии таъсиси Қӯшунҳои сарҳадӣ таҷлил гардид
Мубориза ба муқобили терроризми байналмилалӣ масъалаи афзалиятноки замони муосир аст
«КОРВОНИ ДИДОР». Модарон дар қисмҳои ҳарбӣ бо шароити хизмати фарзандон шинос мешаванд
Дар Душанбе ду далели вайрон намудани қоидаҳои истифодаи неруи барқ ошкор карда шуд
Дар Душанбе ҷаласаи Шурои роҳбарони ниҳодҳои амниятӣ ва хадамоти махсуси кишварҳои аъзои Иттиҳоди Давлатҳои Мустақил оғоз шуд