Ҳоким Холиқзода: «Бузургтарин корхонаҳои саноатии ҷаҳон ба маъданҳои Тоҷикистон ниёз доранд»
ДУШАНБЕ, 29.10.2024 /АМИТ «Ховар»/. «Давоми 10 соли охир ҳамаи мо шоҳиди ҳодисаҳо ва равандҳое гардидем, ки ҳаёт ва муносибати моро ба бисёре аз паҳлуҳои ҳаёти ҳаррӯзаамон ба куллӣ тағйир доданд. Дар ҳаёти инсоният хатару мушкилоте, ба монанди тағйирёбии иқлим, паҳншавии бемории сироятии COVID-19 ва муноқишаҳо дар нуқтаҳои гуногуни ҷаҳон пеш омадаанд. Аз ин рӯ рушди технологияҳои нав, рақамикунонӣ ва инноватсия метавонанд барои мо роҳҳои нави ҳалли мушкилот ва ноил шудан ба рушди устуворро боз намоянд»,-гуфт муовини якуми Сарвазири Ҷумҳурии Тоҷикистон Ҳоким Холиқзода имрӯз дар ифтитоҳи нахустин Форум ва Намоишгоҳи байналмилалии сармоягузории маъдан ва металлургияи Тоҷикистон дар Душанбе.
Ба андешаи Ҳоким Холиқзода, муҳим он аст, ки имконияти мавҷударо барои баланд бардоштани некӯаҳволии инсон, рушди иқтисодӣ ва устуворӣ истифода барем. Дар ин замина лоиҳаҳои дорои хусусияти минтақавӣ ва самти инноватсионӣ аҳамияти хосса пайдо менамоянд.
«Боварӣ дорам, ки форуми имрӯза ба пайдо кардани роҳҳои ҳалли ин мушкилот ва таҳкими ҳамкории давлатҳои Осиёи Марказӣ, Аврупо ва кишварҳои Халиҷ мусоидат менамояд. Тоҷикистон дорои захираҳои бойи табиӣ, махсусан захираҳои энергетикии «сабз» ва захираҳои маъданӣ аст, ки барои иқтисоди «сабз» зарур мебошанд. Тоҷикистон то соли 2037 истеҳсоли неруи таҷдидшавандаро то 98% афзоиш хоҳад дод. Мо ният дорем, ки Точикистонро ба мамлакати сабзу хуррам табдил диҳем. Зимнан, Неругоҳи барқи обии «Роғун» бо иқтидори 3600 мегаватт дар Тоҷикистон намунаи барҷастаи тарҳи бисёрҷониба буда, сохтмонаш тибқи талабот ва меъёрҳои байналмилалӣ амалӣ мешавад. Бояд гуфт, ки мо ҳоло ҳамагӣ 5% иқтидори гидроэнергетикиамонро истифода бурда истодаем ва 95% ин иқтидор дар интизори сармоягузорӣ қарор дорад»,-изҳор дошт Ҳоким Холиқзода ва илова намуд, ки дар ҷумҳурӣ барои азхуд намудани иқтидори энергияи офтобӣ ва бодӣ корҳо оғоз гардидаанд.
Муовини якуми Сарвазири Ҷумҳурии Тоҷикистон ба иштирокчиён хотиррасон намуд, ки бузургтарин корхонаҳои саноатии ҷаҳон ба маъданҳои Тоҷикистон ниёз доранд ва бо назардошти захираҳои ғании маъдан мамлакат метавонад дар ин самт шарики калидӣ гардад. Дар Тоҷикистон беш аз 800 кони маъданҳои фоиданок, металлҳои нодир ва қиматбаҳо, аз ҷумла мис, нуқра, тилло, сурб, литий, сурма, никел, волфрам ва ғайра кашф шудаанд, ки аксари онҳо аллакай қисман азхуд карда шудаанд.
АКС: АМИТ «Ховар»
Дар Нозироти андози шаҳри Ваҳдат 804 субъекти хоҷагидори амалкунанда сабти ном шудааст
Дар Душанбе Фестивали занбӯрпарварон, намоиш ва фурӯши асал баргузор шуд
Дар Тоҷикистон беш аз 800 ҳазор тонна картошка ҷамъоварӣ гардидааст
Дар шаҳри Норак Фестивал-намоишгоҳи байналмилалии «Ганҷинаи хатлон» баргузор гардид
Дар вилояти Суғд 109 корхонаи нави саноатӣ таъсис гардид
Мутахассисони Тоҷикистон дар Чин бо навовариҳои соҳаи пахтакорӣ шинос шуданд
Натиҷаҳои рушди иқтисодии Тоҷикистон дар Таиланд муаррифӣ гардиданд
Дар Тоҷикистон ҷаласаи 46-уми Шурои ҳамоҳангсозии электроэнергетикии Осиёи Марказӣ доир шуд
Шаҳри Панҷакентро дар нуҳ моҳ беш аз 40 ҳазор сайёҳон тамошо намудаанд
Дар Агентии инноватсия ва технологияҳои рақамӣ масъалаҳои зеҳни сунъӣ ва амнияти рақамӣ баррасӣ шуданд
Ҳамкории стратегӣ дар самти ҷалби сармоягузории устувор ва маблағгузории иқлимӣ тақвият меёбад
Намояндаи Бонки миллии Тоҷикистон дар ҷаласаи роҳбарони бонкҳои марказии кишварҳои Шарқи Наздик ва Осиёи Марказӣ иштирок намуд
