ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. 26 ҳазор нафар сокинони шаҳраки Ғончӣ бо оби нӯшокии хушсифат таъмин мегарданд

Июнь 18, 2019 08:53

ДУШАНБЕ, 18.06.2019. /АМИТ «Ховар»/. Бахшида ба  30-солагии Истиқлолияти давлатии Ҷумҳурии Тоҷикистон дар ноҳияи Деваштичи вилояти Суғд сохтмони беш аз 300 иншооти муҳими иҷтимоӣ ба нақша гирифта шудааст. То имрӯз наздики 100 иншооти мазкур  мавриди истифода қарор гирифтааст. Дар ин бора ба АМИТ «Ховар» аз маркази матбуоти Раиси вилояти Суғд хабар доданд.

Дар асоси дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳия корҳои омодагӣ ба истиқболи  ин ҷашни таърихии мамлакат  бомаром идома доранд.

Тибқи иттилои манбаъ, чанд рӯз қабл раиси вилояти Суғд Раҷаббой Аҳмадзода бо мақсади шиносоӣ бо  раванди корҳои ободониву созандагӣ аз  ноҳияи Деваштич боздид намуда, дар маркази  ноҳия ва Ҷамоати деҳоти Яхтан бо ҷараёни сохтмони як қатор иншооти  ҷашнӣ шинос гардид.

«Р.Аҳмадзода сараввал бо рафти таъмиру мумфаршкунии роҳи даромадгоҳи ноҳия то шоҳроҳи Душанбе – Хуҷанд  шинос гардид. Дарозии ин роҳ 16,4 километр ва паҳноияш 8 — 10 метрро ташкил дода,  он аз ҷониби Дирексияи сохтмонии иншооти ҳукуматии Дастгоҳи иҷроияи Президенти Ҷумҳурии Тоҷикистон пурра навсозӣ хоҳад шуд. Чуноне иттилоъ дода шуд, мумфаршкунии роҳ тибқи нақша идома дошта, то имрӯз наздики  8 км –и  он  мумфарш карда шудааст», — афзуд манбаъ.

Бояд гуфт, ки дар Ҷамоати деҳоти Яхтан ва шаҳраки Ғончӣ таъмири бинои муассисаи таҳсилоти миёнаи умумии рақами 17, сохтмони боғчаи бачагонаву бунгоҳи тиббӣ, бинои маъмурии Нозироти андоз, таваллудхонаи ноҳиявӣ, майдони Парчами давлатии Ҷумҳурии Тоҷикистон ва Боғи фарҳангӣ-фароғатии ба номи Деваштич ва хатти оби нӯшокӣ идома дорад.

Ба иттилои маркази матбуоти Раиси вилояти Суғд, муассисаи таҳсилоти миёнаи умумии рақами 17 аз зумраи иншоотест, ки солҳои 80-уми асри гузашта сохта шудааст. Бинои таълимӣ дорои 22 синфхона буда, аз соли 2003 инҷониб таъмир нагардидааст.  Алҳол   навсозии ин муассисаи таълимӣ идома дошта,  то имрӯз 60 дарсади корҳо ба анҷом расонида шудааст.

Бинои нави муассисаи томактабии Ҷамоати деҳоти Яхтан барои қабули 240 нафар хурдсолон  пешбинӣ гардида, он бо маблағгузории мақомоти иҷроияи ҳокимияти давлатии вилоят бунёд хоҳад шуд. Корҳои сохтмонӣ дар ин иншоот тибқи нақша ҷараён дошта, то имрӯз 75 фоизи корҳо ба анҷом расонида шудааст.

«Инчунин маркази нави саломатӣ бо 8 ҳуҷраи корӣ ба истифода дода мешавад. Дар назар аст, ки бо ифтитоҳи марказ вазъи хизматрасонии тиббӣ дар Ҷамоати деҳоти Яхтан беҳтар шуда, то 10 нафар кормандони соҳаи тиб бо ҷойи кор таъмин шаванд»,- илова намуд манбаъ.

Таваллудхонаи марказии ноҳияи Деваштич бо 100 кат ва тамоми шароити зарурӣ мавриди истифода қарор хоҳад гирифт. Ин муассисаи тиббӣ  аз 84 ҳуҷра иборат буда, барои 100 кат пешбинӣ шудааст. Бо ба анҷомрасии корҳои сохтмонӣ тамоми утоқҳо бо навтарин дастгоҳу таҷҳизот муҷаҳҳаз гардонида мешаванд.

Майдони Парчами давлатии Ҷумҳурии Тоҷикистон ва Боғи фарҳангӣ-фароғатии ба номи Деваштич бо маблағгузории мақомоти иҷроияи ҳокимияти давлатии вилоят дар масоҳати 1,6 гектар бунёд гардида, дар он барои истироҳату фароғати сокинон шароитҳои зарурӣ фароҳам оварда мешавад. Тибқи лоиҳа сутунпояи Парчами давлатӣ 50 метрро ташкил медиҳад ва дар майдони Парчам ва Боғи фарҳангӣ-фароғатии ба номи Деваштич бунёди нишастгоҳу фаввораҳо ва гулгаштҳо ба нақша гирифта шудааст.

Бинои маъмурии Нозироти андози ноҳияи Деваштич аз ҷумлаи дигар иншооти ҷашниест, ки ба истиқболи 30-солагии Истиқлолияти давлатӣ  сохта хоҳад шуд. Иншооти мазкур бо маблағгузории Кумитаи андози назди Ҳукумати Ҷумҳурии Тоҷикистон дар ҳаҷми 2,5 миллион сомонӣ бунёд ёфта, барои кормандони нозирот шароити мусоиди корӣ фароҳам оварда мешавад. Бинои сохташаванда аз ду ошёна  ва таҳхона иборат буда, дорои 10 утоқӣ корӣ, маҷлисгоҳ, ошхона ва дигар ҳуҷраҳои ёрирасон мебошад.

Хатти оби нӯшокии шаҳраки Ғончӣ бошад бо фармоиши Корхонаи воҳиди давлатии «Хоҷагии манзилию коммуналӣ» бунёд  мегардад. Дарозии хатти мазкур 7,2 км буда, бо татбиқи пурраи лоиҳа наздик 26 ҳазор нафар бо оби нӯшокии хушсифат таъмин мегарданд.

Июнь 18, 2019 08:53

Хабарҳои дигари ин бахш

БА ИСТИҚБОЛИ 35-СОЛАГИИ ИСТИҚЛОЛИ ДАВЛАТӢ. То соли 2025 дар Восеъ 25 муассисаи таълимӣ бунёд мегардад
БА ИСТИҚБОЛИ 35-СОЛАГИИ ИСТИҚЛОЛИ ДАВЛАТӢ. Дар ноҳияи Айнӣ ба сохтмони чойхонаи миллӣ, маркази савдо ва хизматрасонӣ санги асос гузошта шуд
35-СОЛАГИИ ИСТИҚЛОЛИ ДАВЛАТӢ. Дар ноҳияи Шаҳринав 3 коргоҳи дузандагӣ ба фаъолият оғоз кард
35-СОЛАГИИ ИСТИҚЛОЛИ ДАВЛАТӢ. Дар Конибодом бунёди 40 адад иншооти соҳаи маориф дар назар аст
Пешвои миллат Эмомалӣ Раҳмон дар деҳоти Лолазори ноҳияи Данғара муассисаи таълимиро мавриди баҳрабардорӣ қарор доданд
Президенти Тоҷикистон Эмомалӣ Раҳмон дар ноҳияи Данғара бинои филиали БДА ҶТ «Амонатбонк»-ро ифтитоҳ намуданд
Сарвари давлат Эмомалӣ Раҳмон дар ноҳияи Данғара Боғи фарҳангию фароғатиро ифтитоҳ намуда, ба ятимон туҳфаҳо тақдим карданд
Оғози сафари кории Пешвои миллат Эмомалӣ Раҳмон дар ноҳияи Данғара ва ифтитоҳи марҳилаҳои 3 ва 4-уми Маҷмааи нассоҷии ҶСП «Ҷунтай-Данғара Син Силу Текстил»
ПАНҶСОЛАИ РУШДИ САНОАТ. Дар ноҳияи Бобоҷон Ғафуров бунёди 20 корхонаи саноатӣ ба нақша гирифта шудааст
Раиси вилояти Хатлон аз коргоҳҳои саноатии ноҳияи Восеъ боздид намуд
Имсол дар ноҳияи Мастчоҳ дар 12 500 гектар чигит кишт мешавад
Дар Турсунзода сохтмони биноҳои нави таълимӣ дар назди 24 мактаб бо фарогирии 5640 ҷойи нишаст пешбинӣ шудааст