ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Дар ноҳияи Темурмалик 7 коргоҳи дӯзандагӣ ва 11 дӯкони ҳунармандӣ ба истифода дода мешаванд

Октябрь 31, 2019 11:07

ДУШАНБЕ, 31.10.2019 /АМИТ «Ховар»/. Ба ифтихори 30-солагии Истиқлолияти давлатии Ҷумҳурии Тоҷикистон дар шаҳру ноҳияҳои мамлакат корҳои сохтмониву ободонӣ бомаром идома доранд. Давоми се соли минбаъда  бояд дар ҳар як деҳа ва маҳалли аҳолинишини мамлакат коргоҳҳои дӯзандагӣ, майдончаҳои варзишӣ, қасрҳои фарҳанг, бунгоҳҳои тиббӣ, ҳаммом, сартарошхона, кошонаи ҳусн, пулҳо, марказҳои савдо ва боғҳои фарҳангию фароғатӣ бунёд карда шаванд. 

Бо мақсади рушду тараққӣ додани соҳаи варзиш дар ҷамоати Танобчии ноҳияи Темурмалик аз тарафи соҳибкори маҳаллӣ  Н. Қаюмов  ба маблағи 150 ҳазор сомонӣ  майдончаи варзишӣ  мавриди баҳрабардорӣ  қарор гирифт.

Дар ин бора сармутахассиси бахши меъморӣ  ва шаҳрсозии Мақомоти иҷроияи ҳокимияти давлатии ноҳия Даврон Одинаев ба хабарнигори АМИТ «Ховар»  иттилоъ дод. Ӯ ҳамчунин зикр кард, ки дар баробари ба истифода додани майдончаи варзишӣ  боз як зумра иншооти таъйиноти гуногун ба истифода дода шуданд. Бояд гуфт, ки то соли 2021 дар ҳудуди ноҳия 7 толори варзишӣ  ва 23 майдончаи варзишӣ  ба истифода дода мешаванд.

Мавсуф ҳамчунин зикр кард, ки дар се соли оянда дар ҳудуди ноҳияи Темурмалик бунёди 270 иншооти ҷашнӣ  ба нақша гирифта шудааст.  Ҳоло дар 106 иншоот корҳои сохтмонӣ ба анҷом расида, мавриди истифодаи умум қарор дода шуданд.

Ёдовар бояд шуд, ки то соли 2021 дар ноҳияи Темурмалик дар маҷмуъ 13 бунгоҳи тиббӣ, 8 муассисаи томактабӣ, 6 китобхона, 3 қасри фарҳанг, 1 боғи фарҳангӣ, 2 гулгашт, 2 беморхона, 7 маркази тиббӣ, 1 таваллудхона, 9 нуқтаи хатнакунии кӯдакон, 8 дорухона, 7 майдончаи бозии кӯдакон, 4 меҳмонхонаи замонавӣ, 17 сартарошхона, 14 ҳаммом, 15 кошонаи ҳусн, 5 маркази савдо, 9 маркази хизматрасонӣ, 2 корхонаи коркарди шир, 7 коргоҳи дӯзандагӣ  ва 11 дӯкони ҳунармандӣ бунёд мегарданд.

Д. Одинаев дар идомаи суҳбат афзуд, ки дар баробари дигар иншооти сохташаванда таъмири 5 пул, чароғонкунии кӯчаҳо ва кашидани хатҳои оби нӯшокӣ  дар назар дошта шудааст.

Инчунин қасри фарҳанг дар деҳаи Чилчаи ҷамоати Бобоюнус аз ҷониби ҶДММ «Фараҳноз»- и шаҳри Кӯлоб ба маблағи 1 миллиону 28 ҳазор сомонӣ, таъмири асосии боғчаи №1 дар ҷамоати шаҳраки Совет ба маблағи 800 ҳазор сомонӣ  аз ҷониби соҳибкори маҳаллӣ М.Зокиров, бинои маркази хизматрасонӣ, сартарошхона, кошонаи ҳусн, ҳаммом, коргоҳи дӯзандагӣ  ва дӯкони кулолгарӣ  ба маблағи 450 ҳазор сомонӣ  аз тарафи соҳибкори маҳаллӣ  мавриди истифода қарор дода шуданд, ки хурсандии сокинони Ҷамоати деҳоти Танобчии  шаҳраки Совет ҳадду канор надорад.

Дар робита ба Солҳои рушди деҳот, сайёҳӣ  ва ҳунарҳои мардумӣ  дар ноҳия сохтмони  7 коргоҳи дӯзандагӣ  ва 11 дӯкони ҳунармандӣ,  аз ҷумла, коргоҳи қолинбофӣ, атласбофӣ  ва адрасбофӣ  дар назар дошта шудааст.

Октябрь 31, 2019 11:07

Хабарҳои дигари ин бахш

БА ИФТИХОРИ НАВРӮЗ. Дар шаҳри Турсунзода 30 иншооти гуногун ба истифода дода шуд
АРМУҒОНИ НАВРӮЗӢ. Дар шаҳри Ҳисор бинои баландошёнаи истиқоматӣ ба истифода дода шуд
Дар арафаи Ҷашни байналмилалии Наврӯз дар шаҳри Турсунзода иншооти соҳаи тандурустӣ ба истифода дода шуд
Шарҳи сафари кории Пешвои миллат Эмомалӣ Раҳмон дар шаҳри Душанбе
Сарвазири Тоҷикистон ҷиҳати шиносоӣ бо ҷараёни корҳои соҳилмустаҳкамкунӣ ва ифтитоҳи иншооти нав ба ноҳияҳои Мир Сайид Алии Ҳамадонӣ ва Фархор сафар намуд
Сарвазири Тоҷикистон Қоҳир Расулзода дар шаҳри Кӯлоб ва ноҳияи Восеъ бо ҳолати пойгоҳҳои обкашӣ ва ҷараёни корҳои соҳилмустаҳкамкунӣ шинос гардид
Маҷлиси Ҳукумати Ҷумҳурии Тоҷикистон баргузор шуд
Дар шаҳри Кӯлоб 165 иншооти таъйиноти гуногун ба истифода дода мешаванд
БАХШИДА БА 35-СОЛАГИИ ИСТИҚЛОЛИ ДАВЛАТӢ. Дар Ҷамоати деҳоти Чоркӯҳи шаҳри Исфара беш аз 100 иншооти таъйиноти гуногун бунёд, таъмир ва навсозӣ мешаванд
БА ИСТИҚБОЛИ 35-СОЛАГИИ ИСТИҚЛОЛИ ДАВЛАТӢ. Дар шаҳри Ваҳдат 92 корхонаю коргоҳи саноатӣ ба истифода дода мешаванд
БА ИСТИҚБОЛИ 35- СОЛАГИИ ИСТИҚЛОЛИ ДАВЛАТӢ. Дар ноҳияи Фирдавсии пойтахт 6 мактаб ва 10 муассисаи томактабии замонавӣ сохта мешаванд
35-СОЛАГИИ ИСТИҚЛОЛИ ДАВЛАТӢ. Бахшида ба ин ҷашн дар ноҳияи Шоҳмансури шаҳри Душанбе 149 бинои баландошёна сохта мешавад