Дар Тоҷикистон амалиёти навбатии «Пиёдагард» оғоз гардид

ДУШАНБЕ, 11.02.2020. /АМИТ «Ховар»/. Бо мақсади таъмини бехатарии ҳаракат дар роҳ ва пешгирии садамаҳои роҳу нақлиётӣ бо иштироки пиёдагардон Раёсати БДА ВКД Ҷумҳурии Тоҷикистон дар қаламрави ҷумҳурӣ аз 11 то 20 феврали соли 2020 амалиёти «Пиёдагард» доир менамояд. Дар ин бора ба мухбири АМИТ «Ховар» Файзалӣ Ниёз сардори шуъбаи ташвиқоту таблиғоти Раёсати Бозрасии давлатии автомобилии Вазорати корҳои дохилии Ҷумҳурии Тоҷикистон Акбар Қурбонзода хабар дод.

Бино ба иттилои манбаъ, дар ин давра аз тамоми шаҳрвандони ҷумҳурӣ даъват карда мешавад, ки дар ташкил ва гузаронидани чорабинии мазкур фаъол бошанд. Инчунин талаботи қоидаҳои ҳаракат дар роҳро риоя намуда, ҳаёти худ ва дигаронро зери хатар нагузоранд.

Мақсад аз роҳандозӣ намудани амалиёти «Пиёдагард» коҳиш додани сатҳи садаманокӣ дар ҷумҳурӣ мебошад. Дар баъзе ҳолатҳо садамаҳои нақлиётӣ дар саросари ҷумҳурӣ маҳз бо иштироки пиёдагардон ба амал меоянд, ки ин боиси ташвишу нигаронист.

Агар ба омор назар афканем, мебинем, ки танҳо давоми моҳи январи соли равон дар ҳудуди ҷумҳурӣ 89 ҳодисаи роҳу нақлиёт ба қайд гирифта шудааст, ки 43- тои онро пахшкунии пиёдагардон ташкил медиҳад. Дар  натиҷаи  ин ҳодисаҳо 11 нафар пиёдагард ба ҳалокат расида, 35 тани дигар ҷароҳати гуногуни ҷисмонӣ бардоштаанд.

Ба таъкиди сардори шуъбаи ташвиқоту таблиғоти РБДА, дар баробари гузаронидани чорабиниҳои мақсаднок, аз ҷумла дар доираи амалиёти «Пиёдагард», ҳамчунин аз ҷониби кормандони БДА ва кормандони ғайрибастӣ дар муассисаҳои таълимӣ ва олӣ  суҳбату вохӯриҳо баргузор карда мешаванд.

АКС аз бойгонӣ