Ба кишоварзони Турсунзода барои содироти ангур ба хориҷи Тоҷикистон кумак мерасонанд

Июнь 10, 2021 08:58

ДУШАНБЕ, 10.06.2021 /АМИТ «Ховар»/. Дар Ҷамоати деҳоти ба номи Ҷӯра Раҳмонови шаҳри Турсунзода доир ба содироти маҳсулоти кишоварзӣ, махсусан ангур ба хориҷи мамлакат машварати корӣ  баргузор шуд. Дар ин бора аз мақомоти иҷроияи ҳокимияти давлатии шаҳри Турсунзода ба АМИТ «Ховар» хабар доданд.

Дар машварат муовини раиси шаҳри Турсунзода  Ғафурҷон Собирзода изҳор дошт, ки «тибқи маълумоти кишоварзон соли равон  ҳосили ангури хушсифат дар токзорҳои шаҳр нисбат ба солҳои қаблӣ зиёд буда, барои  содироти он  ба хориҷи кишвар  ба деҳқонон  танҳо  дар   барасмиятдарории гумрукӣ мусоидат намоянд, чунки  дар ин раванд  ҳуҷҷати сифат ва бехатарии маҳсулоти кишоварзӣ, шаҳодатномаи мутобиқати стандартӣ ва дигар ҳуҷҷатҳои зарурӣ аз масъалаҳои аввалиндараҷа маҳсуб мешаванд.

 -Бо мақсади дастгирии кишоварзон ва сарфа намудани вақти онҳо  дар самти содироти ангур ба хориҷи мамлакат мақомоти иҷроияи ҳокимияти давлатии шаҳри Турсунзода  дар назди Ҷамоати деҳоти ба номи Ҷӯра Раҳмонов аз ҳисоби мутахассисони соҳаи гумрук, «Тоҷикстандарт» ва дигар мақомоти дахлдор дафтари корӣ  таъсис медиҳад. Дар ин замина аз ҷониби мутахассисон омода кардани ҳуҷҷатҳо ва декларатсияи маҳсулот дар маҳал иҷро гардида, ҳамлу нақл ва барасмиятдарории гумрукии маҳсулот осонтару дастрас  гардида, маҳсулот аз маҳали истеҳсол ба содирот равона мегардад, -иттилоъ дод муовини Раиси шаҳри Турсунзода  Ғафурҷон Собирзода.

Номбурда ҳамчунин таъкид намуд, ки мақомоти иҷроияи ҳокимияти давлатии шаҳри Турсунзода бо кишоварзон ҷиҳати саривақт ба содирот баровардани маҳсулоти кишоварзӣ  ҳамкории зич ба роҳ мондааст.

Дар машварат ҳамчунин намояндагони Раёсати минтақавии гумрукӣ дар шаҳри Турсунзода, Маркази ташхиси минтақавии “Тоҷикстандарт”, Маркази таъминоти бехатарии озуқаворӣ дар шаҳри Турсунзода ва хоҷагидорони деҳоти мазкур  иштирок доштанд.

Ёдовар мешавем, ки деҳқонону ангурпарварони шаҳри Турсунзода соли 2020 коркарди ангурро ба таври густурда ба роҳ монда, дар натиҷа 150 тонна мавиз омода намуданд, ки  90 тоннааш ба хориҷи мамлакат,  асосан ба кишварҳои ҳамҷавори Ӯзбекистон ва Қирғизистон содир гардид.

Хотиррасон мешавем, ки коркарди маҳсулоти кишоварзӣ, хусусан хушкмева  ва содироти он ба хориҷи мамлакат  зери таваҷҷуҳи доимии  Сарвари давлат муҳтарам Эмомалӣ Раҳмон қарор дошта, дар ин самт деҳқонону  ангурпарварони шаҳри Турсунзода, ки таҷрибаи бой доранд, дастуру супоришҳои Пешвои миллатро сармашқи кори худ қарор дода, дар татбиқи яке аз ҳадафҳои стратегии Ҳукумати Ҷумҳурии  Тоҷикистон–таъмини амнияти озуқаворӣ нақши муассир мегузоранд.

Деҳқонону ангурпарварони шаҳр ба коркарди ангур хеле ҳавасманд буда, аз ин ҳисоб ҳамасола фоидаи калон ба даст меоранд.

Аксҳо аз МИҲД-и шаҳри Турзунзода ва бойгонии АМИТ «Ховар»

Июнь 10, 2021 08:58

Хабарҳои дигари ин бахш

Дар Душанбе «TajRupt» — нахустин лабораторияи зеҳни сунъӣ ифтитоҳ гардид, ки дар Осиёи марказӣ беназир аст
БМТ:Тамсилаи мутавозуни ниҳодии шаффофияти гардиши воситаҳои асъории ММПИМ муаррифӣ гардид
Дар Бохтар Форуми соҳибкорони Тоҷикистону Ӯзбекистон ифтитоҳ ёфт
Фурудгоҳи байналмилалии «Нурсултон Назарбоев» парвозҳоро ба Тоҷикистон афзоиш медиҳад
Дар Бохтар иштирокчиёни ҳамоиши соҳибкоронро аз Ӯзбекистон гарм истиқбол намуданд
ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Аз 474 иншооти ҷашнии шаҳру деҳоти Исфара 435 адади он мавриди истифода қарор гирифтааст
Азим Иброҳим ва Муҳаммад Довуд Султонзуй бо мақсади рушди тиҷорат соддагардонии раванди ҳамлу нақли байналмилалиро мувофиқи мақсад арзёбӣ намуданд
Қаҳҳорзода ва Ардакиён рушди ҳамкории иқтисодию тиҷоратии Тоҷикистону Эронро баррасӣ намуданд
Байни Ҷумҳурии Тоҷикистон ва АБР Созишномаи маблағгузорӣ оид ба ислоҳоти андоз ба имзо расид
Пайвастани Панҷакент бо Самарқанд тавассути шохаи роҳи оҳан ба нақша гирифта шудааст
Сохтмони роҳи мошингард аз Дарвозаи ғарбӣ то маҳаллаи Чортут дар Душанбе баррасӣ шуд
Дар Душанбе масоили ҷалби сармояи Россияро ба иқтисоди Тоҷикистон баррасӣ карданд