«Маснавии маънавӣ»-и Ҷалолиддини Балхӣ дар ганҷинаи тамаддуни олам мавқеи сазовор дорад
ДУШАНБЕ, 30.09.2021 /АМИТ «Ховар»/. Имрӯз бахшида ба Рӯзи Мавлоно Ҷалолиддини Балхӣ дар толори «Арғунун»-и Донишкадаи давлатии фарҳанг ва санъати Тоҷикистон ба номи Мирзо Турсунзода ҳамоиши фарҳангӣ доир шуд, хабар доданд аз ин донишкада ба АМИТ «Ховар».
Зимни ифтитоҳи ҳамоиш ректори донишкада, доктори илмҳои филологӣ, профессор Муҳриддин Низомӣ иброз дошт, ки «беш аз ҳаштсад сол аст Мавлоно мардумро шефтаи рафтору гуфтор ва осори безаволи хеш менамояд. Дар баробари муҳаққиқини ҳамзабон иддае аз донишмандони хориҷӣ умри хешро сарфи омӯзишу таҳқиқ ва нашри осори Мавлоно кардаанд, ки имрӯз ба шарофати ин иқдоми накӯ номи эшон дар радифи бузургтарин олимони ҷаҳон муаррифӣ мешавад».
Муҳриддин Низомӣ дар бораи камолоти маънавии Мавлоно бо такя ба сарчашмаҳои муътамад сухан гуфта, нақши Ҳаким Саноӣ ва Шайх Аттори Нишопуриро дар ҳаёти маънавии ин орифи бузург дар паҳнои ирфону адаби форсизабон муҳим арзёбӣ намуд. Зикр кард, ки дар камолоти маънавии Мавлоно ҳамзамон шахсиятҳои бузурги адабию ирфонии гузаштаю муосири ӯ нақши муассире доранд, ки ҳам худи Мавлоно ва ҳам муаллифони сарчашмаҳои адабию ирфонӣ ин нуктаро таъкид кардаанд.
Ба зикри мудири кафедраи филология Зулайхо Изатова, осори гаронбаҳои Мавлоно, бахусус «Маснавии маънавӣ»-и ӯ дар ганҷинаи тамаддуни олам ҷойгоҳи сазовор дорад, зеро, ба гуфтаи ӯ,- дар он масъалаҳои мубраму ҳассоси ҳаёту маънавиёти ҷомеа, асрори ҳастии оламу одам ба қалам дода шудаанд. Илова бар ин мавзӯъҳо дар осори Ҷалолиддини Балхӣ роҳу василаҳои ташаккули инсон ва таълиму тарбияи ӯ ба қалам омадаанд. Яке аз чунин василаҳо тарғиби ахлоқи наку ва накуҳиши хулқи бад аст.
— Мавлоно дар боби ахлоқ ва тарбият, нуктаҳои бадеъ ва санҷида дорад. Дар замоне ки раванди ҷаҳонӣ шудан босуръат идома дорад ва ҳуҷуми фарҳангҳои мухталиф боиси касодии ахлоқи ҷомеа мегардад, умед аст, ки пандҳои ҳакимонаву орифонаи Мавлоно чун сипар ахлоқи ҳамидаи инсониро ҳифз менамоянд ва дар ҷомеа пояҳои одамиятро устувор месозанд, — иброз дошт Зулайхо Изатова.
АКС аз Донишкадаи давлатии фарҳанг ва санъати Тоҷикистон
ЭҲЁ ВА РУШДИ ЗАБОНИ ДАВЛАТӢ ДАР ПАРТАВИ СИЁСАТИ ФАРҲАНГИИ ПЕШВОИ МИЛЛАТ. Ба Рӯзи забони давлатии Ҷумҳурии Тоҷикистон бахшида мешавад
Маросими ифтитоҳи расмии Бозиҳои XVI Делфӣ дар Театри давлатии академии опера ва балети Тоҷикистон доир мегардад
Сафорати Тоҷикистон дар Узбекистон дар Фестивали анъанаҳои фарҳангӣ ва таомҳои миллии намояндагиҳои дипломатӣ дар Тошканд ширкат варзид
Бостоншиносон бори нахуст маданияти моддии Панҷакенти замони Сомониёнро таҳқиқ менамоянд
25 сентябр дар Академияи миллии илмҳо Рӯзи дарҳои кушода гузаронида мешавад
Дар ноҳияи Исмоили Сомонии шаҳри Душанбе Маркази хизматрасонии «Сад ранги чакан» ифтитоҳ ёфт
ҲАМЛАИ ТАҶОВУЗКОРОНАИ ҚИРҒИЗИСТОН. Жапаров дар иҷлоси СММ сухан гуфта, гумон кардааст аз минбари Жогорку Кенеши Қирғизистон ҳарф мезанад,- сармуҳаррири рӯзномаи «Ҷаҳони Паём»
Ба шарафи Рӯзи Рӯдакӣ дар Институти илмҳои гуманитарӣ конференсияи илмӣ-амалӣ баргузор шуд
Дар Душанбе бахшида ба Рӯзи Рӯдакӣ ҳамоиш баргузор мешавад
«ТОҶИКИСТОН — КИШВАРИ ДАРЁҲОИ ТИЛЛОӢ». Дар Осорхонаи таърихии вилояти Суғд шакли хурди намоиш ифтитоҳ ёфт
ҲАМЛАИ ТАҶОВУЗКОРОНАИ ҚИРҒИЗИСТОН. Марзбонони қирғиз борҳо санадҳои оташбасро дағалона вайрон намуда, гуноҳро ба сари неруҳои марзбони Тоҷикистон мезананд
ҲАМЛАИ ТАҶОВУЗКОРОНАИ ҚИРҒИЗИСТОН. «Баъзе аз намояндагони ин мардум «хати қирмизӣ»-и ҳамсоядориро кайҳо дағалона убур карда буданд»- муовини Сармуҳаррири рӯзномаи «Садои мардум»
