Парчам — вожаи соф тоҷикист, — бардошт аз конференсияи илмӣ-назариявии КИ ҲХД Тоҷикистон дар шаҳри Душанбе

Ноябрь 23, 2021 16:28

ДУШАНБЕ, 23.11.2021. /АМИТ «Ховар»/. Вакилони  Иҷлосияи 16-уми Шӯрои Олии Ҷумҳурии Тоҷикистон дар мавриди тарҳ ва намуди  Парчами давлатии Тоҷикистони соҳибистиқлол дурудароз  табодули афкор карда, баъди радду бадали зиёд Низомномаи онро қабул карданд.  Ҳамин тавр, 24 ноябри соли 1992 Тоҷикистони тозаистиқлол  расман соҳиби  Парчами давлатӣ гардид. Вакилони мардумӣ барои ифодаи номи ин рамз аз байни силсилавожаҳои муродифӣ маҳз вожаи қадимию тоҷикии парчамро пазируфтанд. Ин вожа соф тоҷикист ва бо дирафш иртиботи қавӣ дошта,  имрӯз, хушбахтона, муродифҳои туркию арабии худро мағлуб намуда, ба пирӯзии комил расидааст. Ин матлаб дар  конференсияи илмӣ-назариявӣ таҳти унвони «Парчами давлатии Тоҷикистон – рамзи соҳибистиқлолии кишвар», ки имрӯз бо ташаббуси Кумитаи иҷроияи Ҳизби Халқии Демократии Тоҷикистон дар шаҳри Душанбе бахшида ба Рӯзи Парчами давлатӣ  дар толори БДА “Амонатбонк” баргузор шуд,  баён гардид.

Тавре мухбири АМИТ «Ховар» аз ҷараёни баргузории конференсияи мазкур гузориш медиҳад, дар ҳамоиши мазкур муовини Раиси Ҳизби Халқии Демократии Тоҷикистон Асрор Латифзода, Раиси Кумитаи иҷроияи ҲХДТ дар шаҳри Душанбе Иброҳим Мирзозода, Директори муассисаи давлатии Маркази исломшиносӣ дар назди Президенти Ҷумҳурии Тоҷикистон Абдураҳим Холиқзода, собиқадорони меҳнат, иштирокчиёни Иҷлосияи XVI Шӯрои Олии Ҷумҳурии Тоҷикистон Адолат Раҳмонова ва Ғайбулло Афзалов, Раиси иттифоқи нависандагони Тоҷикистон Низом Қосим Пури Ҷаҳонгир, сардори шуъбаи ташкилӣ, иттилоотӣ ва таҳлилии Дастгоҳи Ваколатдор оид ба ҳуқуқи инсон дар Ҷумҳурии Тоҷикистон Қодирӣ Суҳайлӣ Абдуҳафиззода, раисони кумитаҳои иҷроияи ҳизбии пойтахт, фаъолони кумитаву ташкилотҳои ҳизбӣ ва намояндагони ВАО иштирок доштанд.

Раиси КИ ҲХДТ дар шаҳри Душанбе Иброҳим Мирзозода конференсияро ифтитоҳ намуда, ҳамаи ҳизбиёни пойтахтро ба муносибати Рӯзи Парчам табрик намуда, зикр кард, ки «Парчами миллӣ мояи ифтихори ҳар шаҳрванди Тоҷикистони соҳибистиқлол, ифодагари иттиҳоду сарҷамъӣ, нангу номус, ватандӯстиву ватанпарастӣ ва ҳувияти миллии мардуми фарҳангии мо буда, мақсаду мароми созандаи тоҷиконро дар ҷилои рангҳои худ инъикос намудааст».

Сипас Муовини Раиси Ҳизби Халқии Демократии Тоҷикистон Асрор Латифзода оид ба таърихи  Парчами миллӣ ва аҳамияти арҷгузорӣ ба он изҳори назар кард.

Дар идомаи конференсия Директори Маркази исломшиносӣ дар назди Президенти Ҷумҳурии Тоҷикистон Абдураҳим Холиқзода дар мавзӯи  «Парчами давлатӣ — рамзи худшиносии миллӣ ва сиёсӣ», собиқадори меҳнат, иштирокчии Иҷлосияи XVI Шӯрои Олии Ҷумҳурии Тоҷикистон Адолат Раҳмонова дар мавзӯи «Нақши таърихии Парчами давлатии Ҷумҳурии Тоҷикистон дар таҳкими сулҳу ваҳдат», сардори шуъбаи ташкилӣ, иттилоотӣ ва таҳлилии Дастгоҳи Ваколатдор оид ба ҳуқуқи инсон дар Ҷумҳурии Тоҷикистон дар мавзӯи «Тафсири Қонуни Ҷумҳурии Тоҷикистон дар бораи рамзҳои давлатии Ҷумҳурии Тоҷикистон ва Низомномаи Парчами давлатии Ҷумҳурии Тоҷикистон» маърӯза намуданд. Раиси иттифоқи нависандагони Тоҷикистон Низом Қосим Пури Ҷаҳонгир дар васфи Парчами давлатии Ҷумҳурии Тоҷикистон шеърҳо қироат намуда, собиқадори меҳнат,  иштирокчии Иҷлосияи XVI Шӯрои Олии Ҷумҳурии Тоҷикистон Ғайбулло Афзалов ёддоштҳои худро аз ҷараёни қабули Низомномаи Парчами давлатии Ҷумҳурии Тоҷикистон дар Иҷлосияи XVI иброз дошт.

Дар фарҷоми конференсия миёни иштирокчиён мубодилаи афкор сурат гирифт.

Ҳамзамон дар доираи чорабинии мазкур аз ҷониби аъзоёни Ташкилоти ҷамъиятии ҷавонон “Созандагони Ватан” аксияи иттилоотӣ ва тақсими шириниҳо баргузор гардид. Дар рафти аксияи варақаҳои иттилоотӣ оид ба таърихи Парчами давлатӣ, шириниҳо парчамҳои сарисинагӣ ва рӯйи мизӣ ба сокинону меҳмонони пойтахт тақсим карда шуд.

АКСҲО: Кумитаи иҷроияи ҲХДТ дар шаҳри Душанбе

Ноябрь 23, 2021 16:28

Хабарҳои дигари ин бахш

Ғолибони озмуни «Шоҳин» муайян гардиданд
«БУНЁДИ МИЛЛАТ АЗ МАОРИФ ОҒОЗ МЕЁБАД». Ҷаласаи солонаи ҳайати мушовара дар Вазорати маориф ва илми мамлакат
Дар Душанбе ғолибони олимпиадаҳои байналмилалӣ қадрдонӣ гардиданд
«РУШДИ МАОРИФ ДАР МЕҲВАРИ ПАЁМИ ПРЕЗИДЕНТ». Таҳти ин унвон дар Душанбе ҳамоиши кормандони соҳа доир гардид
«САГВАФО». Имрӯз ба зодрӯзи муаллифи ин ҳикояи марғуб Шоири халқии Тоҷикистон Ғаффор Мирзо 93 сол пур мешавад
БАРНОМАИ ФУЛБРАЙТ. Омӯзгорони тоҷик метавонанд дар мактабҳои Амрико таҷриба омӯзанд, дарс гӯянд, маҳораташонро такмил дода, ба хонандагону донишҷӯёни ИМА давлати худро муаррифӣ кунанд
Соли 2021 олимони АМИТ 18 патент барои ихтироот ва 21 қарори мусбат оид ба додани патенти Тоҷикистон барои ихтироотро ба даст оварданд
Театри давлатии академии опера ва балети Тоҷикистон ва Театри давлатии академии калони Узбекистон Ёддошти тафоҳум ба имзо расониданд
БЛИНКЕН МУСИҚИИ ТОҶИКИРО ДӮСТ МЕДОРАД. Роҳбари Департаменти давлатии ИМА дар бораи сурудҳои дӯстдоштааш изҳори назар намуд
ИМРӮЗ- РӮЗИ ТАВАЛЛУДИ НЮТОН. Барои чӣ мо бояд дар ин бора донем ва чаро Президенти Ҷумҳурии Тоҷикистон солҳои 2020-2040-ро Бистсолаи омӯзиш ва рушди илмҳои табиатшиносӣ, дақиқ ва риёзӣ дар соҳаи илму маориф эълон карданд?
Дар давраи таътил дар Суғд озмуни вилоятии «Китобхони беҳтарин» гузаронида мешавад
«Донишномаи Донишгоҳи омӯзгорӣ» интишор шуд