«РАССОМИ НАВРАС». Дар Душанбе озмуни соҳибистеъдодҳо доир мегардад

Декабрь 4, 2021 09:04

ДУШАНБЕ, 04.12.2021 /АМИТ «Ховар»/. Аз 21 то 25 декабр дар шаҳри Душанбе бахшида ба 30- солагии Истиқлолияти давлатии Ҷумҳурии Тоҷикистон ва Солҳои рушди деҳот, сайёҳӣ ва ҳунарҳои мардумӣ» бо ташаббуси Вазорати фарҳанги Ҷумҳурии Тоҷикистон таҳти унвони «Рассоми наврас» озмуни соҳибистеъдодҳо доир мегардад, ки дар он наврасони аз 7 то 18-сола метавонанд иштирок намоянд, иттилоъ доданд ба АМИТ «Ховар» аз маркази матуботи Вазорати фарҳанги мамлакат.

Озмуни соҳибистеъдодҳои «Рассоми наврас» бо мақсади ҷалби ҷавонону наврасон ба соҳаи санъати тасвирӣ, ҳайкалтарошӣ, санъати ороишӣ-амалӣ (кулолгарӣ, заргарӣ), рассомӣ, таблиғу ташвиқ ва дастгирии истеъдодҳои наврас, баланд бардоштани сатҳи зебоишиносии ҷавонон, омода намудани истеъдодҳои ҷавон ба озмуну фестивалҳои байналмилалӣ, ҳавасмандгардонии омӯзгорон ва наврасону ҷавонон, дарёфт ва тарғиби асарҳои рассомони ҷавон, интихоби ҷавонони боистеъдод барои таҳсил дар муассисаҳои таълимии миёна ва миёнаи касбии Вазорати фарҳанги Ҷумҳурии Тоҷикистон равона гардидааст.

Озмун мусобиқаи эҷодӣ буда, дар ду давр аз рӯи равияҳои санъати тасвирӣ ва ороишӣ-амалӣ дар мавзӯъҳои Тоҷикистон, истиқлол, рушди деҳот, сайёҳӣ ва ҳунарҳои мардумӣ ва вобаста ба синн дар се гурӯҳ доир мегардад.

а) гурӯҳи хурдсол (аз 7 то 10-сола);

б) гурӯҳи наврасон (аз 11 то 14-сола);

в) гурӯҳи наврасон (аз 15 то 18-сола).

Хоҳишмандон ҳуҷҷатҳои зерини худро то 15 декабр метавонанд ба кумитаи тадорукот супоранд: нусхаи шаҳодатномаи таваллуд ё шиноснома; расми асарҳои иҷрогардида дар андозаи 30х40 см.(формати А3);  тавсияномаи эҷодии роҳбари муассисаи таълимӣ; ду дона расми 3х4 см.

Иштирокчиёни озмун имкон доранд, ки аз рӯи намудҳои зерин асарҳои ҳунарии хешро пешниҳод менамоянд: санъати тасвирӣ (мусаввирӣ, графика, ҳайкалтарошӣ), санъати ороишӣ-амалӣ (кандакорӣ, наққошӣ, заргарӣ, кулолгарӣ, батик-нақш дар матоъ, гобелен-қолинбофии бадеӣ) ва дизайн (графикаи компютерӣ, санъати мӯд).

Ба ҳайати кумитаи тадорукот кормандони масъули вазорат дохил шуда, ба ҳайати доварон мутахассисони варзидаи мактабҳои олӣ ва миёнаи касбӣ шомил мешаванд.

Ғолибони ҷой аввал (гурӯҳи хурдсолон ва ду гурӯҳи наврасон) 3 нафар дар ҳаҷми 1000 сомонӣ, ҷои дуюм (гурӯҳи хурдсолон ва ду гурӯҳи наврасон) 3 нафар дар ҳаҷми 800 сомонӣ ва ҷои сеюм (гурӯҳи хурдсолон ва ду гурӯҳи наврасон) 3 нафар дар ҳаҷми 700 сомонӣ, инчунин бо ифтихорномаҳо, мукофотпулӣ ва туҳфаҳо сарфароз гардонида мешаванд. Ҳамчунин ба 31 нафар Дипломи озмун, мукофотпулӣ дар ҳаҷми 500 сомонӣ низ тақдим мегардад.

Вазорати фарҳанг, кумитаи тадорукоти озмун устодонеро, ки шогирдонашон маҳорати хуб нишон додаанд, аъзои кумитаи тадорукот, ҳайати доваронеро, ки дар ташкилу гузаронидани озмун саҳми арзанда гузоштаанд, бо мукофотҳо сарфароз мегардонад.

Хоҳишмандон метавонанд ба суроғаи шаҳри Душанбе, хиёбони Айнӣ 31, Донишкадаи давлатии санъати тасвирӣ ва дизайни Тоҷикистон ва ба кумитаи тадорукот бо рақамҳои 904-44-31-80, 93-153-70-40, 93-555-61-74 муроҷиат намоянд.

АКС аз Вазорати фарҳанги ҶТ

Декабрь 4, 2021 09:04

Хабарҳои дигари ин бахш

Имрӯз дар шаҳри Душанбе ҳаво рӯзона то 23 дараҷа гарм мешавад
Дар натиҷаи сӯхтори киштии мусофирбар дар Филиппин 12 нафар ба ҳалокат расид
Имрӯз дар ноҳияҳои алоҳидаи Тоҷикистон борон пешгӯӣ мешавад
«Ватанпарвар» дар Роштқалъа наврасонро ба хизмати Модар-Ватан омода менамояд
Шумораи бедаракшудагон дар Эквадор бар асари ярч ба 71 нафар расид
Имрӯз дар шаҳри Душанбе ҳаво рӯзона то 24 дараҷа гарм мешавад
Ба сокинони ҷамоатҳои деҳоти Даҳана ва Зиракии шаҳри Кӯлоб Паёми Президенти Тоҷикистон ба Маҷлиси Олии Ҷумҳурии Тоҷикистон тавзеҳ дода шуд
Бар асари фаромадани ярч дар қисмати марказии Эквадор 16 нафар ба ҳалокат расид
Тӯфони марговари «Фредди» якбора чанд рекорд нишон дод
Ҳар панҷумин белгиягӣ маҷбур аст, ки маҳсулотро аз хориҷа харидорӣ кунад
Бар асари тирпаронӣ дар мактаби Нэшвиллеи Амрико шаш нафар ба ҳалокат расид
80 ҷавони синни даъватӣ дар Мактаби муттаҳидаи техникии шаҳри Турсунзода касби ронандагӣ меомӯзад