30 нафар хонандагони мактабҳои Тоҷикистон сазовори аттестати аълои универсалӣ ва равиявӣ бо медали тилло ва нуқра гардиданд

ДУШАНБЕ, 25.07.2022. /АМИТ «Ховар»/. 30 нафар хонандагони мактабҳои Тоҷикистон сазовори аттестати аълои унверсалӣ гардиданд. Дар натиҷаи ҷамъбасти озмун барои соҳиб шудан ба аттестати аълои универсалӣ хонандагони шаҳри Душанбе сазовори 13 медали тилло, хонандагони вилояти Суғд сазовори 7 медали тилло ва 1 медали нуқра, хонандагони вилояти Хатлон сазовори 6 медали тилло ва 1 медали нуқра ва хонандагон шаҳру ноҳияҳои тобеи ҷумҳурӣ сазовори 1 медали тилло ва 1 медали нуқра гардиданд. Дар ин бора ба АМИТ «Ховар» дар маркази матбуоти Вазорати маориф ва илми Ҷумҳурии Тоҷикистон хабар доданд.

Дар маросими ҷамъбасти озмун Вазири маориф ва илм Раҳим Саидзода иброз дошт, ки «маориф ва илм дар сиёсати давлат ва Ҳукумати Ҷумҳурии Тоҷикистон яке аз соҳаҳои афзалиятнок ва калидӣ эълон гардида, Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни баромадҳои худ борҳо гуфтаанд, ки «ман дар сиёсати худ маорифро дар ҷойи аввал мегузорам» ва дар ин замина таъкид низ медоранд, ки «кӯдакони болаёқат захираи тиллоии миллат мебошанд».

Тазаккур дода шуд, ки соли равон аз тарафи раёсат ва шуъбаҳои маорифи шаҳру ноҳияҳои ҷумҳурӣ ва муассисаҳои таълимии дорои мақоми ҷумҳуриявӣ 144 нафар довталаб ба озмуни аттестати аълои равияи универсалӣ, табиӣ-риёзӣ ва ҷамъиятӣ-гуманитарӣ бо медали тилло ва нуқра пешниҳод гардиданд, ки аз ин шумора 45 нафари онҳо (5 нафар ба аттестати аълои универсалӣ бо медали тилло, 11 нафар аттестати аъло бо медали тиллои равияи ҷамъиятӣ-гуманитарӣ, 26 нафар аттестати аъло бо медали тиллои равияи табиӣ-риёзӣ ва 3 нафар аттестати аъло бо медали нуқраи равияи табиӣ-риёзӣ) барои иштирок дар озмуни мазкур роҳ ёфтанд.

Таҳлилҳо нишон доданд, ки маъмурияти аксари муассисаҳои таълимӣ дар пешниҳод намудани ҳуҷҷатҳои довталабони аттестати аъло бо медали тилло ва нуқра ба саҳлангорӣ роҳ дода, ҳуҷҷатҳоро бар хилофи талаботи “Низомномаи аттестати аълои универсалӣ бо медали тилло ва нуқра, аттестати аълои равиявӣ бо медали тилло ва нуқра ва тасдиқ намудани ҳуҷҷатҳои давлатии махсус ва Тартиби бо аттестати аълои универсалӣ бо медали тилло ва нуқра, аттестати аълои равиявӣ бо медали тилло ва нуқра мукофотонидани хатмкардагони муассисаҳои таҳсилоти миёнаи умумии Ҷумҳурии Тоҷикистон” пешниҳод намудаанд, ки дар натиҷа аз ҷониби комиссияи экспертӣ дар ҳуҷҷатҳои довталабон камбудиҳои зиёд ба қайд гирифта шуданд.

Ёдовар мешавем, ки озмун барои дарёфти аттестати аълои унверсалӣ  21-22 июли соли равон доир шуда, маросими ҷамъбасти он 23 июл дар Мактаби байналмилалии президентӣ дар шаҳри Душанбе баргузор гардид.

АКС: маркази матбуоти Вазорати маориф ва илми Ҷумҳурии Тоҷикистон