ДАР ТОШКАНД ФОРУМИ ДУЮМИ ИҚТИСОДИИ КИШВАРҲОИ УЗВИ СҲШ ДОИР МЕШАВАД. Бо ибтикори Тоҷикистон он бори аввал моҳи июни соли гузашта баргузор шуда буд

Август 12, 2022 12:24

ДУШАНБЕ, 12.08.2022 /АМИТ «Ховар»/. Ҳайати расмии Тоҷикистон таҳти роҳбарии муовини аввали Вазири рушди иқтисод ва савдои Ҷумҳурии Тоҷикистон Ашӯрбой Солеҳзода дар Форуми дуюми иқтисодии Созмони Ҳамкории Шанхай /СҲШ/, ки 16-17 августи соли 2022 дар Тошканд баргузор мешавад, ширкат хоҳад кард. Дар ин бора ба АМИТ «Ховар» дар маркази матбуоти Вазорати рушди иқтисод ва савдои ҷумҳурӣ хабар доданд. «Иштирокдорони форум иқтисодиёти рақамӣ, ҷорӣ намудани технологияҳои сабз, ҳамкорӣ байни минтақаҳо дар соҳаҳои гуногун ва дигар мавзӯъҳои марбутаро баррасӣ хоҳанд кард», — иттилоъ доданд дар вазорат.

Бино ба иттилои маркази матбуоти Вазорати сармоягузорӣ ва савдои хориҷии Узбекистон, дар доираи форум ҳамчунин баргузории ҷаласаи пленарӣ, ҷаласаҳои панелӣ, мулоқоти дуҷониба ва гуфтушунидҳои корӣ дар назар аст. Ҳайатҳои кишварҳои СҲШ дурнамои ҳамкории сармоягузорӣ ва ҳамкории саноатиро баррасӣ мекунанд.

Ёдовар мешавем, ки нахустин Форуми иқтисодии СҲШ 23-24 июни соли 2021 дар шаҳри Душанбе дар мавзӯи «Тақвияти ҳамкорӣ дар соҳаи иқтисодиёти рақамӣ, тиҷорати электронӣ ва инноватсия» баргузор гардида буд. Форум худро ҳамчун платформаи муассири муколама муаррифӣ кардааст, ки ба рушд ва таҳкими минбаъдаи шарикӣ дар дохили созмон мусоидат мекунад.


Тавре қаблан АМИТ «Ховар» хабар дода буд, бо мақсади тақвияти ҳамкории кишварҳои узви СҲШ дар соҳаи тиҷорату иқтисод Ҷумҳурии Тоҷикистон тобистони соли гузашта ташаббусро доир ба гузаронидани Форуми иқтисодии СҲШ, ки барои мусоидат намудан ба барқарории робитаҳои мустақим ва рушди муносибатҳои байнидавлатӣ, таҳкими робитаҳои субъектҳои иқтисодии давлатҳои аъзои СҲШ, фароҳам овардани фазои мусоид барои ҳамкории тиҷоратию иқтисодӣ ва сармоягузории кишварҳои узви СҲШ, инчунин муттаҳидсозии иқтидори иқтисодии кишварҳои узви СҲШ пешбинӣ шудааст, ба миён гузошт.

Бо ин мақсад Консепсияи Форуми иқтисодии Созмони Ҳамкории Шанхай таҳия ва барои баррасӣ ба ҷонибҳо пешниҳод гардид, ки дар ҷаласаи Шӯрои сарони кишварҳои узви Созмони Ҳамкории Шанхай дар Душанбе ба тасвиб расид.

СҲШ созмони байналмилалиест, ки соли 2001 таъсис ёфтааст. Ҳиндустон, Қазоқистон, Чин, Қирғизистон, Русия, Тоҷикистон, Покистон ва Узбекистон аъзои доимии СҲШ мебошанд.

Кишварҳои нозир: Афғонистон, Эрон, Муғулистон ва Беларус (ба таври расмӣ барои шомил шудан ба СҲШ ба ҳайси узви комилҳуқуқ муроҷиат кардааст) мебошанд.

Кишварҳои шарик: Озарбойҷон, Арманистон, Камбоҷа, Непал, Туркия ва Шри-Ланкаанд. Илова бар ин, тартиби пазируфтани Эрон ба ин созмон ва додани мақоми шарикӣ оид ба муколама ба Миср, Қатар ва Арабистони Саудӣ оғоз шудааст.

Марзия САИДЗОДА,
АМИТ «Ховар»

АКС: Вазорати рушди иқтисод ва савдои Тоҷикистон

 

Август 12, 2022 12:24

Хабарҳои дигари ин бахш

Кишоварзони Тоҷикистон соли гузашта бо 1664 адад техникаву таҷҳизот таъмин гардиданд
Барои ҳудудҳои махсус муҳофизатшавандаи табиии Тоҷикистон бо забонҳои русӣ ва англисӣ шиносномаҳо таҳия карда шудаанд
Вазорати кишоварзӣ: «Имтиёзҳои фароҳамоварда ба рушди соҳаи моҳипарварӣ дар Тоҷикистон мусоидат намуданд»
Нишасти матбуотӣ: «Соли 2022 зиёда аз 1739 гектар ҷангалзор бунёду барқарор карда шуд»
ТАШАББУСҲОИ ГЛОБАЛИИ ПРЕЗИДЕНТИ ТОҶИКИСТОН. Яке аз онҳо Соли байналмилалии ҳифзи пиряхҳо эълон кардани соли 2025 аз ҷониби СММ аст
БАХШИДА БА СОЛҲОИ РУШДИ САНОАТ. Соли гузашта дар Хуҷанд 40 корхонаи нав ба истифода дода шуд
Агентии беҳдошти замин ва обрасонӣ: «Шабакаҳои обрасони Тоҷикистон ба мавсими имсола пурра омодаанд»
Мошинҳои боркаши Тоҷикистон пас аз се соли хуруҷи пандемия вориди Чин шуданд
ҲУКУМАТИ ЭЛЕКТРОНӢ. 50 вазорату идораҳои давлатии Тоҷикистон ба шабакаи мазкур пайваст гардиданд
Нишасти матбуотӣ: «Дар Тоҷикистон то танзими нархи маҳсулоти кишоварзӣ содироти баъзе намудҳои он қатъиян манъ карда шудааст»
Дар анбору сардхонаҳои вилояти Суғд маҳсулоти кишоварзӣ дар ҳаҷми зарурӣ захира карда шудааст
ИСТЕҲСОЛИ 21 МИЛЛИАРДУ 399,5 МИЛЛИОН КВТ-СОАТ НЕРУИ БАРҚ. Соли 2022 дар низоми энергетикии Тоҷикистон баландтарин нишондиҳанда ба даст омад