ЭҲТИЁТ БОШЕД, ШАКЛИ НАВИ ДУЗДӢ! Дар Душанбе ҷавондухтареро барои тасарруфи маблағҳо аз ҳамёни электронӣ дастгир намуданд

Январь 20, 2023 11:14

ДУШАНБЕ, 20.01.2023. /АМИТ «Ховар»/. Кормандони мақомоти милитсияи пойтахт дар натиҷаи чорабиниҳои фаврӣ-ҷустуҷӯӣ сокини 19-солаи шаҳри Душанберо бо ҷурми дуздӣ аз ҳамёнҳои электронии шаҳрвандон боздошт намуданд. Дар ин бора ба АМИТ «Ховар» сухангӯи маркази матбуоти Раёсати Вазорати корҳои дохилӣ дар шаҳри Душанбе Сироҷиддин Шакурӣ хабар дод.

Кормандони мақомоти милитсияи пойтахт дар натиҷаи баррасии арзу шикояти шаҳрвандон якчанд чорабиниҳои фаврӣ-ҷустуҷӯӣ  амалӣ намуда, як нафар ҷавондухтарро ҳамчун гумонбар дар содир намудани ҷинояти дуздӣ дастгир намуданд.

Ин нафар шаҳрванд Носирова С.С., соли таваллудаш 06.10.2004, истиқоматкунандаи шаҳри Душанбе мебошад, ки қаблан бо ҷурми ғоратгарӣ суд шудааст.

«Номбурда шакли нави тасарруфи маблағҳои шаҳрвандонро аз худ намуда, бо ҳар роҳу восита рамзи ҳамёни электронии шаҳрвандонро ба телефони мобилии худ пайваст намуда, маблағҳои онҳоро ба корти бонкии худ интиқол медодааст. Аз ҷумла, бо ҳамин тарз ҳангоми дар дохили маркази савдои «Садбарг» қарор доштанаш бо тариқи пинҳонӣ аз ҳамёни электронии як нафар савдогар маблағи 4490 сомониро тасарруф намуда, аз ҷойи ҳодиса ғайб задааст»,-изҳор дошт С.Шакурӣ.

Ҳамин тариқ, дастгиршуда С. Носирова 18 январи соли равон аз ҳамёни электронии як нафар корманди маркази савдои «Шоҳмансур» низ 7190 сомониашро ба ҳамёни электронии худ гузаронида, ба ҷабрдида зарари калон расонидааст.

Баъд аз дастгир гардидан аз номбурда як миқдор маблағҳои рабудашуда ҳамчун далели шайъӣ дарёфту мусодира карда шуданд.

Дар айни замон гумонбаршаванда С. Носирова дар ҳабси пешакӣ қарор дошта, бо мақсади муайян намудани иштирокаш дар дигар ҳолатҳои ҷиноятӣ корҳои  тафтишӣ идома доранд.

Шаҳлои САДРИДДИН,
АМИТ «Ховар»

АКС: Раёсати ВКД дар шаҳри Душанбе/манбаъҳои боз

Январь 20, 2023 11:14

Хабарҳои дигари ин бахш

Дар пойгоҳи Донишкадаи ҳарбӣ масъалаи рушди илми низомӣ баррасӣ карда шуд
БЕМАСЪУЛИЯТИИ ВОЛИДАЙН. Дар Душанбе давоми чор сол аз ноболиғону наврасон шумораи зиёди силоҳи сард мусодира гардид
Сарбозони шаҳри Бӯстон ҳамсолони худро ба ҳимояи марзҳои муқаддаси Ватан даъват намуданд
Дар Ҳисор озмуни «Ватанпарвар» доир карда мешавад
«МУҚОВИМАТ БА САВДОИ ОДАМОН: МУШКИЛОТ ВА МУЛОҲИЗАҲО». Дар Хоруғ таҳти ин унвон ҳамоиш доир шуд
Дар Хатлон барои наваскарон бурсҳои ройгон ташкил гардиданд
Дар роҳҳои мошингарди минтақаҳои кӯҳии Тоҷикистон хатари лағзиши тарма боқӣ мемонад
Дар машқгоҳи Лоҳур бо ҷалби афсарони ҷузъу томи муҳандисии қисмҳои ҳарбӣ ҷамъомад доир шуд
ТОЛИБОН ОМОДА НЕСТАНД. Коршинос шарҳ дод, ки чаро дар Афғонистон ҳукумати фарогир таъсис дода намешавад
Ҷинояткорони дар Тоҷикистон пинҳонгардида ба Қазоқистон истирдод карда шуданд
Ҳушдори Вазорати корҳои дохилии ҶТ ба ронандагон: бе таъмини сӯзишвории дизелии зимистона ва хушсифат ба роҳ набароед!
Хизматчиёни Артиши миллии Тоҷикистон дар машқгоҳи «Фахробод» ба малакаи касбӣ тақвият бахшиданд