Тарбияи ватандӯстӣ омили асосии муқовимат бар зидди терроризму экстремизм мебошад

ДУШАНБЕ, 19.09.2023 /АМИТ «Ховар»/. 18 сентябр дар ноҳияи Мастчоҳ дар партави татбиқи Қонуни Ҷумҳурии Тоҷикистон «Дар бораи тарбияи ватандӯстии шаҳрвандон» вохӯрӣ доир гардид, хабар медиҳад АМИТ «Ховар» бо истинод ба дафтари матбуоти Раиси ноҳияи Мастчоҳ.

Дар вохӯрӣ масъалаҳои муҳиму бунёдии тарбияи ватандӯстӣ, фарогирии шаҳрвандон, хосса наврасону ҷавонон ба ин раванд, ташаккули ҳисси шаҳрвандӣ, эҳтиром ва арҷгузорӣ ба муқаддасоту арзишҳои миллӣ ва ҳифзи онҳо мавриди таваҷҷуҳ ва баррасӣ қарор гирифтанд.

Таъкид гардид, ки тарбияи дуруст ва созанда, инчунин тақвияти эҳсоси ватандӯстии шаҳрвандон, махсусан наврасону ҷавонон дар меҳвари сиёсати ватандӯстонаи Президенти мамлакат муҳтарам Эмомалӣ Раҳмон қарор дорад. Ҷавонони даврони истиқлол ҳамқадами ин марҳилаи нави таърихӣ буда, бояд дорои мавқеи устувор, андешаҳои ваҳдатофар ва тарғибкунандаи ҷомеа ба сӯи иттиҳод ва ваҳдат бошанд.

Ҳамзамон ҷавононро даъват намуданд, ки барои рушди минбаъдаи давлат ва ҳимояи марзу буми ҷумҳурӣ, инчунин ободии мамлакатамон бо қадамҳои устувор ва андешаҳои созанда талош варзанд ва баҳри ҳифзи марзу хоки Ватан садоқатмандона хизмат намоянд.

АКС: дафтари матбуоти Раиси ноҳияи Мастчоҳ