ҶУДО. Тоҷикистонро дар мусобиқаи ҷаҳонии Гран-прии Португалия нуҳ паҳлавон муаррифӣ менамояд

ДУШАНБЕ, 21.01.2024 /АМИТ «Ховар»/. Аз 26 то 28 январ дар шаҳри Одивелас мусобиқаи ҷаҳонии Гран-прии Португалия оид ба гӯштини ҷудо баргузор мегардад. Дар ин хусус шореҳи варзиши АМИТ «Ховар» бо истинод ба Федератсияи ҷудои Тоҷикистон хабар медиҳад.

Барои иштирок дар ин мусобиқа 641 варзишгар (356 мард, 285 зан) аз 90 давлат номнавис шудаанд. Аз ҷумла, Федератсияи ҷудои Тоҷикистон 9 варзишгар, аз ҷумла Муҳаммадсолеҳ Қувватов (дар вазни то 60кг), Меҳрзод Суфиев (дар вазни то 60кг), Муҳаммадшариф Наҷмуддинов (дар вазни то 73кг), Муҳаммадҷон Абдуҷалилзода (дар вазни то 81кг), Умедҷон Раҷабов (дар вазни то 90кг), Комроншоҳ Устопириён  (дар вазни то 90кг), Абубакри Акобир ва Эмомризо Анварзода (ҳарду дар вазни то 100кг) ва Аҳлия Муминоваро (дар вазни то 52кг) ба Португалия равон менамояд.

Қобили тазаккур аст, ки ғолибону ҷоизадорон дар баробари медал бо ҷоизапулӣ қадрдонӣ мешаванд. Ба ғолибон 3000 евро, барандагони медали нуқра 2000 ва барандагони медали биринҷӣ 1000 евро супурда мешавад.

Ҳамчунин варзишгарон хол гирифта, мавқеашонро дар раддабандии олимпӣ беҳтар менамоянд.

АКС: Федератсияи ҷудои Тоҷикистон