Дар Душанбе масъалаи сармоягузорӣ ба соҳаи тандурустӣ баррасӣ гардид

ДУШАНБЕ, 14.05.2024 /АМИТ «Ховар»/. 13 май дар шаҳри Душанбе таҳти унвони «Сармоягузорӣ ба тандурустӣ: ифтитоҳи нақшаи чорабиниҳои афзалиятноки Ҷумҳурии Тоҷикистон барои солҳои 2024-2026» ҳамоиш доир гардид. Дар он муҳимияти самтҳои афзалиятноки нақшаи амали солҳои 2024-2026-и Стратегияи ҳифзи солимии аҳолии Ҷумҳурии Тоҷикистон барои давраи то соли 2030 мавриди баррасӣ қарор дода шуд. Дар ин хусус АМИТ «Ховар» бо истинод ба Вазорати тандурустӣ ва ҳифзи иҷтимоии аҳолии мамлакат иттилоъ медиҳад.

Дар ҳамоиш гуфта шуд, ки чор самти аз ҳама муҳиму аввалиндараҷаи Стратегияи ҳифзи солимии аҳолии Ҷумҳурии Тоҷикистон барои давраи то соли 2030- ин беҳтар намудани дастрасӣ, сифат ва эътинои хизматрасонии кумаки аввалини тиббию санитарӣ, маблағгузории устувор, низомҳои иттилоотии идоракунии тандурустӣ ва тандурустии рақамӣ ва таъмини рушди устувори захираҳои кадрӣ мебошад.

Бояд гуфт, ки дар самти аввал ба масъалаҳои такмилу навсозии заминаи моддию техникии муассисаҳои шабакаи кумаки аввалини тиббию санитарӣ, беҳтар намудани сифати хизматрасонӣ, дастрасӣ ба дору ва ҳавасмандгардонии мутахассисон аҳамияти аввалиндараҷа дода мешавад.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон