«МО, ҶАВОНОН НАСЛИ ХУШБАХТИ ТОҶИКИСТОНЕМ!». Дар Донишгоҳи давлатии омӯзгорӣ ҷавонони фаъолро қадрдонӣ намуданд

ДУШАНБЕ, 23.05.2024. /АМИТ «Ховар»/. Дар Донишгоҳи давлатии омӯзгории Тоҷикистон ба номи Садриддин Айнӣ бахшида ба Рӯзи ҷавонони Тоҷикистон таҳти унвони «Мо, ҷавонон насли хушбахти Тоҷикистонем!» барномаи  фарҳангӣ баргузор гардид. Дар ин хусус ба АМИТ «Ховар» дар Донишгоҳи давлатии омӯзгории Тоҷикистон хабар доданд.

Ҳамоиш дар доираи моҳвораи ҷавонон баргузор гардида, ба ифтихори Рӯзи ҷавонон дар донишгоҳ якчанд мусобиқаи варзишӣ, аз ҷумла футболи хурд барои дарёфти «Ҷоми ректори донишгоҳ», волейбол, гӯштини миллӣ дар 2 вазн, тенниси рӯи миз, турниккашӣ ва бандкашӣ, инчунин озмуни мақолаи беҳтарин таҳти унвони «Тоҷикистон мамлакати ҷавонон аст» дар байни омӯзгорони ҷавон ва донишҷӯёни 14 факултет натиҷагирӣ карда шуд.

Ғолибони озмуну мусобиқаҳо дар вазъияти тантанавӣ бо ҷом, диплом, Ифтихорнома ва сипосномаҳои донишгоҳ, Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Иттифоқи касабаи кормандони маориф ва илм ва Раёсати кор бо ҷавонон ва варзиши шаҳри Душанбе қадрдонӣ карда шуданд.

АКС: Донишгоҳи давлатии омӯзгории Тоҷикистон ба номи Садриддин Айнӣ