Дар деҳаи Корвони шаҳри Ваҳдат бинои нави муссисаи таълимӣ ба истифода дода шуд

ВАҲДАТ, 26.11.2024./АМИТ «Ховар»/. Ба ифтихори 35-солагии Истиқлоли давлатии Ҷумҳурии Тоҷикистон дар деҳаи Корвони Ҷамоати деҳоти Гулистони шаҳри Ваҳдат бинои нави Муассисаи таҳсилоти миёнаи умумии №145 мавриди истифода қарор гирифт. Дар ин хусус ба хабарнигори минтақавии АМИТ «Ховар» Субҳониддини Маҳмуд дар Мақомоти иҷроияи ҳокимияти давлатии шаҳри Ваҳдат хабар доданд.

Бинои нави таълимӣ аз ду ошёна иборат буда, дорои 8 синфхона, утоқи директор, китобхона, ошхона ва хонаи омӯзгорон мебошад. Дар он дар ду баст 480 хонанда дарс меомӯзад.

Сокинони шаҳри Ваҳдат зери сиёсати хирадмандонаи Пешвои миллат муҳтарам Эмомалӣ Раҳмон сарҷамъ гардида, муассисаҳои таълимӣ, бунгоҳу марказҳои саломатии деҳотро обод ва роҳҳои деҳаю маҳаллаҳоро мумфарш менамоянд.

Ба шарафи таҷлили 35-солагии Истиқлолияти давлатии Ҷумҳурии Тоҷикистон- шуруъ аз соли 2023 то имрӯз дар шаҳри Ваҳдат 23 бинои иловагӣ дар назди муассисаҳои таълимӣ ва 144 синфхонаи иловагӣ дар назди 79 муассисаи таълимӣ сохта, ба истифода дода шуд, ки 13 000 ҷойи нишастро ташкил медиҳанд.

Ин ҳама созандагию бунёдкорӣ дар соҳаи маориф мушкилии норасоии ҷойи нишастро дар муассисаҳои таълимӣ бартараф менамояд.

АКС: Мақомоти иҷроияи ҳокимияти давлатии шаҳри Ваҳдат