ГУЛҲОИ ВАТАН ШУКУФТА БОЛОИ ЧАКАН. Дар Академияи идоракунии давлатӣ ҳамоиши фарҳангӣ доир шуд
ДУШАНБЕ, 02.03.2026 /АМИТ «Ховар»/. Дар Академияи идоракунии давлатии назди Президенти Ҷумҳурии Тоҷикистон таҳти унвони «Гулҳои Ватан шукуфта болои чакан» бо иштироки намояндагони мақомоти давлатӣ, аҳли илму фарҳанг ва донишҷӯён ҳамоиши маърифатӣ – фарҳангӣ баргузор гардид. Дар ин хусус ба АМИТ «Ховар» аз академия хабар доданд.
Саҳни академия ва толорҳои он бо ороиши идона зиннат ёфта, намунаҳои нодири ҳунарҳои мардумӣ ва дастовардҳои миллӣ, ки бозгӯи фарҳанги ғании ниёгони тоҷик мебошанд, ба маърази тамошо гузошта шуданд. Меҳмонон бо гӯшаҳои ҳунарҳои мардумӣ, бахусус намоиши матоъҳо ва либосҳои чакан шинос шуда, ба маҳорати ҳунармандон баҳои баланд доданд.
Ректори Академияи идоракунии давлатӣ Даврон Сафарзода иброз дошт, ки баргузории чунин ҳамоишҳо дар фазои илму фарҳанг ба хотири гиромидошти арзишҳои миллӣ ва муаррифии зебоии фарҳанги тоҷикӣ аҳамияти вижа дорад. Таърихи ҳазорсолаи миллати тоҷик саршор аз саҳмгузорӣ дар рушди илму адаб, фалсафа, меъморӣ ва фарҳанги ҷаҳонӣ мебошад.
«Чакан на танҳо як намуди ҳунари мардумӣ, балки рамзи ҳувият, зебоӣ ва ҷаҳонбинии тоҷикон аст. Нақшу нигори рангоранги он, гулҳои зебову рамзии офаридашуда ва таркиби хоси ороишот бозгӯи ормонҳо, ҷаҳонбинӣ ва муносибати аҷдодони мо ба табиат, зиндагӣ ва зебоӣ мебошанд», — гуфт ректори академия.
Иштирокдорони ҷамъомад аз ташаббусҳои давлат ва Ҳукумати Ҷумҳурии Тоҷикистон дар самти рушди фарҳанги миллӣ ёдовар шуданд. Иброз гардид, ки санъати чакандӯзӣ ва зардӯзии тоҷикӣ аз ҷониби ЮНЕСКО ба Феҳристи мероси ғайримоддии фарҳангии башарият ворид гардидааст. Ин эътирофи байналмилалӣ боиси ифтихори миллӣ буда, ҳамзамон масъулияти моро барои ҳифз, омӯзиш ва густариши ин мероси гаронбаҳо бештар мегардонад.
Занони тоҷик давоми таърих на танҳо посдори оила ва ҷомеа, балки ҳомии фарҳанг, тарбиятгар ва интиқолдиҳандаи суннатҳои миллӣ будаанд. Маҳз бо талоши онҳо ҳунарҳои мардумӣ, аз ҷумла чакандӯзӣ то имрӯз ҳифз гардида, аз насл ба насл гузаштааст.
Чакани тоҷик ва дигар анъанаҳои миллӣ минбаъд низ рушд намуда, бо зебоӣ ва маънавиёти ғанӣ Тоҷикистони соҳибистиқлолро дар арсаи байналмилалӣ муаррифӣ мекунанд.
АКС: Академияи идоракунии давлатии назди Президенти Ҷумҳурии Тоҷикистон
Моҳи октябр дар Душанбе Бозиҳои XX Делфии ҷавонони кишварҳои аъзои ИДМ доир мегардад
Дар Душанбе Рӯзҳои кинои Эрон баргузор мегарданд
Дар Рим Намоишгоҳи байналмилалии «Тоҷикистон – кишвари ёдгориҳои нодир» ташкил карда мешавад
Ба ифтихори дохил гардидани Резервати биосферии Ромит ба Шабакаи ҷаҳонии мамнуъгоҳҳои биосферии ЮНЕСКО конфронс доир шуд
Дар Осорхонаи миллии Тоҷикистон маҳфили «Шоҳномахонӣ» баргузор гардид
«ТОҶИ СОМОН». Марҳилаи интихоби беҳтарин филмҳо барои синамоҷоизаи миллӣ оғоз гардид
Котиби генералии Ассамблеяи парламентии Осиё дар Осорхонаи миллӣ бо таъриху тамаддуни тоҷикон шинос шуд
Китоби академик Фарҳод Раҳимӣ «Тамаддуни ориёӣ ва рисолати таърихии миллати тоҷик» нашр шуд
Дар даврони соҳибистиқлолӣ дар вилояти Суғд 152 иншооти фарҳанг бунёд ва таъмиру таҷдид гардидааст
Иштирокдорони Конфронси байналмилалии «Рӯдакӣ – эҳёгари андеша ва фарҳанги миллӣ» Осорхонаи миллии Тоҷикистонро тамошо намуданд
«РӮДАКӢ — ЭҲЁГАРИ АНДЕША ВА ФАРҲАНГИ МИЛЛӢ». Таҳти ин унвон конференсияи байналмилалии илмӣ-назариявӣ доир шуд
«Нақши Пешвои миллат дар эҳё ва муаррифии тамаддуни ориёӣ». Таҳти чунин унвон маҳфили «Тоҷикшиносӣ» доир шуд
