Дар «Тоҷикстандарт» омода намудани коршиносони сатҳи байналмилалӣ ба роҳ монда шуд

Июль 23, 2019 13:50

ДУШАНБЕ, 23.07.2019. /АМИТ «Ховар»/. Бо мақсади ташаккули низоми менеҷменти сифат дар Тоҷикистон Агентии стандартизатсия, метрология, сертификатсия ва нозироти савдо («Тоҷикстандарт») омўзиши мутахассисонро тибқи талаботи стандартҳои байналмилалии силсилаи ISO ба роҳандозӣ намуд.

Тавре дар Агентии «Тоҷикстандарт» ба мухбири АМИТ «Ховар» иброз доштанд, таҳлилҳо аз таҷрибаи ҷаҳонӣ нишон медиҳанд, ки айни замон асоси муваффақият дар идоракунии  корхонаҳо- ин ҷорӣ намудани менеҷменти сифат, истеҳсоли маҳсулоти босифат ва хизматрасонӣ тибқи стандартҳои байналмилалӣ мебошад. Ин омил бевосита ба рақобатпазирии молу маҳсулоти ватанӣ ва дар ин замина ба рушди саноатикунонии босуръати мамлакат мусоидат менамояд.

«Менеҷменти сифат дар корхона ба амалишавии мақсадҳои дар пешгузошташуда, рушди истеҳсолоти маҳсулоти баландсифат, кору хизматрасонӣ, батанзимдарории низоми молиявии корхона ва ҳавасмандгардонии коллективи меҳнатӣ ҷиҳати ноил шудан ба натиҷаҳои ниҳоии дар истеҳсолот банақшагирифташуда нигаронида шудааст», — таъкид намуд манбаъ.

Мавриди зикр аст, ки ҳангоми истифода намудан аз стандарти ISO 9001 — 2015 «Низоми менеҷменти сифат» дар корхона сифати маҳсулоти истеҳсолшудаи ватанӣ (мол, кор ва хизматрасониҳо) ба стандартҳои байналмилалӣ мутобиқ мешавад ва айни замон аз ҷониби Агентии «Тоҷикстандарт» дар 257 корхонаю ташкилоти ватанӣ ҷорӣ намудани низоми менеҷменти сифат ва корҳои сертификатсионӣ тибқи талаботи стандартҳои байналмилалӣ ба сомон расонида шудааст, ки аз ин шумора айни ҳол 214 корхона дорои сертификати амалкунанда мебошанд.

Бо мақсади ҷалб намудани коршиносон ҷиҳати омода намудани коршиносони сатҳи байналмилалӣ аз ҳисоби мутахассисони «Тоҷикстандарт» дар самти ҷорӣ намудани стандартҳои байналмилалӣ дар корхонаҳои истеҳсолӣ, ҳамкорӣ бо ташкилоти ваколатдори Ҷумҳурии Украина  ҶДММ «ИНТЕРСЕРТ УКРАИНА», ки аъзои ташкилоти бонуфузи олмонӣ оид ба сертификатсия «TUV  Thuringen»  маҳсуб меёбад, оғоз гардид. Дар ин робита бо ҷалби намояндаи ширкати мазкур, доктори илмҳои техникӣ, академик Александр Янишевский  омўзиши мутахассисон роҳандозӣ шуд. Мавсуф дар ин соҳа соҳибтаҷриба буда, дар 180 корхонаҳои муқтадир, аз ҷумла дар Германия, Япония, Федератсияи Россия ва Украина дар таҳия ва ҷорӣ намудани низоми менеҷменти сифат ширкат намудааст.

Баъди гузаронидани омӯзиш кормандони масъул тавассути супоридани имтиҳон соҳиби сертификати эксперти сатҳи байналмилалӣ мешаванд ва ин омил барои эътирофи сертификати мутобиқат дар хориҷи мамлакат замина мегузорад.

Қаблан аз ҷониби мутахассисони «Тоҷикстандарт» 12 нафар донишҷўи курси 4-и Донишгоҳи давлатии тиҷорати Тоҷикистон ва Донишгоҳи давлатии молия ва иқтисоди Тоҷикистон ба корҳои таҷрибаомўзӣ дар самти менеҷменти сифат ҷалб карда шуданд.

Соли равон дар 10 корхона аудити инспексионӣ ва дар 31 корхона бо фарогирии 180 нафар намояндагони корхонаҳои истеҳсолӣ ва хизматрасонӣ  тибқи нақшаи тасдиқгардида, дарсҳои омўзишӣ ва корҳои фаҳмондадиҳӣ дар масоили истифодаи стандартҳои байналмилалии силсилаи ИСО 9000 (9001, ИСО 22000, НАССР, 14001 ва 18001) гузаронида шуд.

Июль 23, 2019 13:50

Хабарҳои дигари ин бахш

Дар Эстония Хонаи савдои Тоҷикистон таъсис дода мешавад
Намояндагони Тоҷикистон дар «Аirspace world 2024» дар Женева иштирок намуданд
Роҳбари хоҷагии деҳқонии «Бобои Носир»: «Истифодаи оқилонаи 7,5 гектар замин ва даромад аз он дар баланд гардидани сатҳи зиндагии 5 оила мусоидат намуд»
Деҳқонони ноҳияи Мастчоҳ имсол дар майдони зиёда аз 23 ҳазор гектар кишту парвариши зироати кишоварзиро ба нақша гирифтаанд
Дар шаҳри Хуҷанд Намоишгоҳи X байналмилалии савдо «Суғд-2024» доир мегардад
«РОҲ БА СӮИ ТИЁНШОН». Душанбе охири моҳи май мизбони конфронси байналмилалӣ мегардад
Соли 2023 ба буҷети шаҳри Гулистон аз ҳисоби хизматрасонии сайёҳӣ ва табобатӣ зиёда аз 40 миллион сомонӣ ворид шуд
Ҳоҷагидорони Кооперативи истеҳсолии «Сомон-Бохтар»-и ноҳияи Кӯшониён майдони парвариши лимӯро васеъ менамоянд
Сардхонаи муосири деҳоти «Файзи Истиқлол»-и ноҳияи Кӯшониён ба аҳолӣ хизмат мерасонад
«ТОҶИКИСТОН-2024». Дар Душанбе Намоишгоҳи байналмилалии универсалӣ доир мешавад
120 гектар замини канори деҳаи Ғӯсари шаҳри Панҷакент бо оби полезӣ таъмин мегардад
Масъалаи тезонидани корҳо оид ба тармим ва навсозии нақби «Истиқлол» дар Душанбе баррасӣ гардид