МУНОСИБАТИ МО БА ЗАМИН – БОИГАРИИ АСОСИИ КИШВАРАМОН ЧӢ ГУНА АСТ? Дар ноҳияи Рӯдакӣ 376 ҳолати вайронкунии қонунгузории замин ошкор гардид

Август 31, 2019 12:45

РӮДАКӢ, 31.08.2019 /АМИТ «Ховар»/. Дар натиҷаи гузаронидани санҷишҳои муштарак бо кормандони ҳифзи ҳуқуқ дар ноҳияи Рӯдакӣ 376  ҳолати вайронкунии қонунгузорӣ оид ба замин ошкор гардид. Аз ин шумора 287 ҳолат истифодаи замин бе ҳуҷҷати тасдиқкунандаи  ҳуқуқи истифодаи он мебошад. Дар ин бора сардори идораи замини ноҳияи Рӯдакӣ  Ҷунайдулло Файзализода ба хабарнигори АМИТ «Ховар» иттилоъ дод.

 Тавре пештар иттилоъ дода будем, бо карори суди ҳарбии гарнизони Душанбе сокини ҷамоати Эсанбои ноҳияи Рӯдакӣ Саидқул Ҷониқулов барои худсарона ишғол намудани замини марбут ба хоҷагии ёрирасони Вазорати мудофиаи Тоҷикистон ва дар он сохтани манзили истиқоматӣ тибқи қонунгузории мамлакат гунаҳгор дониста, аз ӯ ба миқдори 50 ҳазор сомонӣ ҷарима ситонида шуд.

ДАР АКС: бунёди манзили истиқоматӣ дар замини худсарона ишғолкардашуда дар ноҳияи Рӯдакӣ. Акс аз байгонӣ.

Аз 376 ҳолати вайронкунии қонунгузории замин, аз ҷумла Кодекси замини Ҷумҳурии Тоҷикистон  24 парванда ба Прокуратураи ноҳия ва 12 парванда ба Суди ноҳия ирсол  гардидааст. Дар маҷмӯъ, 376 нафар қонунвайронкунанда ба маблағи 164 ҳазору 10 сомонӣ ҷарима шуда, 304 ҳолати қонунвайронкунӣ бартараф гардид.

Аз ин рӯ масъулини назорати истифодаи замин дар ноҳияро зарур аст, ки дар давраи аввали худсарона ишғол кардани замин ё ин ки сохтмони худсаронаи хона бо истифода аз чораҳои дар қонун пешбинишуда қонунвайронкуниҳоро пешгирӣ ва бартараф намоянд.

Мутобиқи моддаи 13-и Конститутсияи Ҷумҳурии Тоҷикистон, замин моликияти истисноии давлат буда, давлат истифодаи самараноки онро ба манфиати халқ кафолат медиҳад. Аз ин ҷиҳат истифодаи самараноку оқилонаи замин яке аз вазифаҳои аввалиндараҷа маҳсуб ёфта, шарти асосии баланд бардоштани дараҷаи некуаҳволии халқ ва фароҳам овардани шароити арзандаи зиндагӣ барои ҳар як шаҳрванд мебошад.

Маълум аст, ки 93 фоизи ҳудуди Ҷумҳурии Тоҷикистон кӯҳҳо ва танҳо 7 фоизашро заминҳои ҳамвор ташкил медиҳанд ва таъмини талаботи рӯзмарраи аҳолии мамлакат бо маҳсулоти ғизоӣ яке аз масъалаҳои муҳим ба шумор меравад. Он ба риояи дақиқ ва иҷрои бемайлони қонунгузории замин ва таъмини амнияти озуқаворӣ вобастагии зич дорад. Тавре Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон зикр намудаанд:  «Замин – боигарии асосии кишвари мост. Ояндаи ҷумҳурӣ, ояндаи мардуми он аз рӯи бисёр омилҳо вобаста ба он аст, ки мо муносибати худро ба замин  чӣ гуна  ба роҳ мемонем».

Ҳамаи ин  аз мақомоти иҷроияи ҳокимияти давлатии ноҳияҳо  ва мақомоти ҳифзи ҳуқуқ пурзӯр намудани назоратро дар самти риояи қонунгузории замин, аз ҷумла ҳифзи заминҳои ҳосилхез, пешгирии ғайриқонунӣ тақсим намудан, хариду фурӯш ва худсарона ишғол намудани қитъаҳои заминро талаб менамояд.

 

Август 31, 2019 12:45

Хабарҳои дигари ин бахш

Беш аз 20 корхонаи нассоҷӣ ва дӯзандагии Тоҷикистон аз «UzTextile Expo Spring» боздид намуд
Масъалаи фаъол гардонидани кори Шӯрои ҳамоҳангсозии шарикони рушд дар Душанбе баррасӣ карда шуд
Дар шаҳри Кӯлоб Маркази савдои «Истиқлолият» ифтитоҳ шуд
«АЗ ПАЙИ ИЗИ ДИНОЗАВРҲО». Парки табиии таърихии «Ширкент» бо бунёди инфрасохтор ба яке аз мавзеъҳои ҷолиби сайёҳии Тоҷикистон табдил мегардад
Дар Душанбе Форуми соҳибкории Тоҷикистон ва Корея баргузор мешавад
Дар Душанбе ҷаласаи ҳаштуми Шӯрои миллии суботи молиявӣ дар Ҷумҳурии Тоҷикистон баргузор гардид
«ИСТЕҲСОЛИ ТОҶИКИСТОН». Таҳти ин тамға корхонаи «Субҳи Ватан»-и Исфара содироти меваи хушкро ба роҳ мондааст
Бори аввал дар Тоҷикистон ба парвариши моҳии навъи «бестер» хоҷагии «Моҳипарварии Каёнуш»-и ноҳияи Данғара шуруъ менамояд
Дар фабрикаи ресандагии ноҳияи Мастчоҳ 500 нафар соҳиби ҷойи кор мегардад
Дар Минтақаи озоди иқтисодии «Данғара» корхонаи истеҳсоли тамоку бунёд мегардад
Роҳсозон мавзеъҳои мушкилтарини роҳи Қалъаихумб — Ванҷ — даромадгоҳи ноҳияи Рӯшонро ҳамвор намуда, ба ҳудуди қитъаҳои 4-5-и лоиҳа дохил шуданд
Дар Ховалинг кишти картошка идома дошта, асосан тухмии беларусӣ кошта мешавад