Рустам Назарзода, раиси КҲФ ва МГ: «Шахсоне, ки дар ҷойҳои барои шиноварӣ мамнӯъ оббозӣ менамоянд, муҷозот мешаванд»

Июль 23, 2020 13:30

ДУШАНБЕ, 23.07.2020 /АМИТ «Ховар»/. Интизор меравад, ки дар оянда шаҳрвандоне, ки дар дарёву кӯлҳо, обанбор ва дигар иншооти обие, ки барои шиноварӣ манъ шудааст, оббозӣ менамоянд, муҷозот  хоҳанд гардид.

Раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон Рустам Назарзода имрӯз дар Душанбе дар  нишасти матбуотӣ гуфт, ки Кумитаҳои ҳолатҳои фавқулода ва мудофиаи граждании назди Ҳукумати  Ҷумҳурии Тоҷикистон тасмим гирифтааст, ки дар ин маврид лоиҳаи санади меъёрии ҳуқуқӣ    омода намуда, барои баррасӣ ва тасдиқ ба Ҳукумати  Ҷумҳурии Тоҷикистон пешниҳод намояд. Тибқи он,  шахсоне, ки дар ҷойҳои барои шиноварӣ мамнӯъ оббозӣ менамоянд, ба ҷавобгарӣ кашида шуда, аз онҳо ҷарима ситонида шавад.

Ин тасмими Кумита дар ҳолест, ки  дар натиҷаи риоя накардани қоидаҳои техникаи бехатарӣ ҳангоми шиноварӣ дар дарёву кӯлҳои мамлакат дар шаш моҳи соли равон 34 нафар ғарқ шудаанд. Сарфи назар аз муттасил роҳандозӣ шудани чорабиниҳои мухталиф, гузаронидани санҷишҳо, мулоқот бо истироҳаткунандагон ва суҳбат бо онҳо, интишори мақолаҳо дар нашрияҳо, барномаҳо дар телевизион ва радио, мутаассифона, боз ҳам дар иншооти обӣ одамон ба ҳалокат мерасанд.

Зикр шуд, ки аз 34 нафар ғарқшудагони соли равон 2 нафар бачаҳои синнашон то 4-сола,  8 нафар аз 11 то 16-сола, 16 нафар аз 17 то 35-сола ва  7 нафари онҳо аз 35-сола боло  мебошанд. Ин омор нисбат ба ҳамин давраи соли гузашта коҳиш ёфтааст, зеро дар шаш моҳи соли сипаришуда 57 нафар  ҳангоми оббозӣ ҷони худро аз даст дода буданд.

Коҳиш ёфтани ҳолатҳои ғарқшавии шаҳрвандонро  дар кулу дарёҳо зимни оббозӣ масъулони Кумитаи  мазкур  ба пандемияи COVID-19, риояи қоидаҳои санитарӣ,  эҳтиёткории шаҳрвандон ва бунёду ба истифода додани ҳавзу маҷмааҳои шоноварӣ дар мамлакат, аз  ҷумла дар пойтахти ҷумҳурӣ рабт доданд.

Июль 23, 2020 13:30

Хабарҳои дигари ин бахш

Дар Бохтар лоиҳаи «Шаҳри бехатар» амалӣ мегардад
Дар Душанбе мулоқоти роҳбарони вазоратҳои корҳои дохилии Тоҷикистону Беларус баргузор гардид
4364 САДАМАҲОИ РОҲУ НАҚЛИЁТ ДАР 4 СОЛ. Чӣ тавр пеши роҳи ин ҳодисаҳои нохушро бигирем?
Тоҷикистон дар муборизаи муштарак ба муқобили ҷиноятҳои фаромиллӣ фаъолона иштирок мекунад
Дар Душанбе ҷаласаи роҳбарони мақомоти корҳои дохилии пойтахтҳои давлатҳои аъзои Иттиҳоди Давлатҳои Мустақил баргузор гардид
Дар Бӯстон вохӯрии навбатии гурӯҳҳои кории топографӣ ва гурӯҳҳои кории ҳайатҳои ҳукуматии Тоҷикистону Қирғизистон баргузор гардид
Мулоқоти ҳамраисони ҳайатҳои ҳукуматии Тоҷикистон ва Қирғизистон оид ба делимитатсия ва демаркатсияи сарҳади давлатӣ доир шуд
Прокурори генералии Ҷумҳурии Тоҷикистон бо фаъолони вилояти Суғд вохӯрӣ намуд
Антониу Гутерриш: «Тоҷикистон дар масъалаи буҳрони Афғонистон шарики муҳими Созмони Милали Муттаҳид мебошад»
Президенти Тоҷикистон: «Дар фаъолияти Созмони ҳамкории Шанхай масъалаҳои амнияти минтақавӣ аввалиндараҷа боқӣ мемонанд»
ЭҲТИЁТ — НИМИ ҲАЁТ. Дар фасли тобистон зарфҳои нигаҳдории гази моеъро дар ҷойи соя ва дур аз гармӣ гузоред
Дар Петербург масъалаи истифодаи васеи технологияҳои иттилоотию коммуникатсионӣ дар пешниҳоди хизматрасониҳои давлатӣ дар Тоҷикистон баррасӣ шуд