Мутасаддиён барои фаъолияти намунавӣ дар нигоҳубини дарахтони аз хориҷа воридшуда ҳавасманд мегарданд

Август 12, 2020 11:10

ДУШАНБЕ, 12.08.2020 /АМИТ «Ховар»/. Минбаъд шахсони  мутасаддӣ  барои фаъолияти намунавӣ дар нигоҳубини дарахтони аз хориҷи мамлакат воридшуда, ки дар кӯчаю хиёбонҳо ва боғу гулгаштҳои шаҳри Душанбе шинонида шудаанд, ҳавасманд карда мешаванд. Бо қарори Раиси шаҳри Душанбе Рустами Эмомалӣ  Сарраёсати молияи шаҳр аз ҳисоби маблағҳои барои иҷрои вазифаҳои пойтахти Ҷумҳурии Тоҷикистон пешбинишуда  ҷиҳати мукофотонидани ғолибон шасту шаш ҳазор сомонӣ ҷудо намуд.

Тавре сардори Раёсати иттилоот ва робитаҳои хориҷии дастгоҳи Раиси шаҳри Душанбе Абдумаҷид Ҳакимзода дар суҳбат бо хабарнигори   АМИТ «Ховар» иброз дошт, тибқи қарори дахлдори  ҳайати Комиссия, тартиб ва меъёри муайян намудани беҳтарин шахсони мутасаддӣ, ки ба парвариш ва нигоҳубини дарахтони аз хориҷи мамлакат овардашуда дар ҳудуди пойтахт   машғуланд,  тасдиқ карда шуд.

«Рустами Эмомалӣ Комиссияи таъсисгардидаро муваззаф намуд, ки  фаъолияти худро тибқи тартиби тасдиқгардида ба роҳ монда, ғолибонро аз рӯи «Нақшаи вобастакунӣ ва нигоҳубини дарахтони хориҷии дар кӯчаю хиёбонҳо ва боғу гулгаштҳои шаҳри Душанбе дар тирамоҳи соли 2019 ва баҳори соли 2020 шинонидашуда», ки аз ҷониби Раиси шаҳри Душанбе 21 майи соли 2020 тасдиқ карда шудааст, муайян намояд»,-афзуд манбаъ.

Ҳавасмандгардонии мазкур аз рӯи се номинатсия сурат мегирад:  «Беҳтарин мутасаддӣ дар боғҳои фарҳангию фароғатии шаҳри Душанбе», «Беҳтарин мутасаддӣ дар кӯчаҳои шаҳри Душанбе» ва «Беҳтарин мутасаддӣ дар хиёбонҳои  шаҳри Душанбе». Барои ғолибони ҷойи якум 10000 сомонӣ, барои мақоми 2-юм 7000 сомонӣ ва барои ишғолкунандагони ҷои сеюм 5000 сомонӣ дар ҳар се номинатсия  муқаррар гардидааст.

Иқдоми мазкур бо мақсади таъмини иҷрои банди 32 нақшаи чорабиниҳои амалисозии дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, ки зимни вохӯрӣ бо роҳбарияти шаҳри Душанбе ва раисони ноҳияҳои шаҳри Душанбе дар «Қасри миллат» 28 апрели соли 2020 баён доштанд, роҳандозӣ мегардад.

Ёдовар мешавем, ки бо мақсади зиёд намудани навъи дарахтони нодир дар тирамоҳи соли 2019 ва баҳори соли 2020  ба миқдори 6444 бех дарахтони ороишию сояафкан ва буттагӣ аз хориҷи мамлакат ворид карда шуда, дар мавзеъҳои муқарраргардидаи ҳудуди шаҳри Душанбе  шинонида шуданд.

Август 12, 2020 11:10

Хабарҳои дигари ин бахш

Озмуни аксҳо таҳти унвони «Душанбе – шаҳри гулҳо ва зебоӣ» эълон гардид
То соли 2030 фаъолияти электросамокатҳо ва электроскутерҳо дар роҳҳои автомобилгарди Душанбе манъ мегардад
«KUDAK.TJ». Бо Қарори Раиси шаҳри Душанбе 20 муассисаи таҳсилоти томактабӣ ба ин барномаи иттилоотӣ пайваст гардид
Омодагӣ ба Форуми байналмилалии сармоягузории «Душанбе инвест-2025» баррасӣ шуд
Сокинону меҳмонони пойтахт тавассути хатсайри «City Tour» зебоиҳои Душанберо тамошо намуданд
Иҷлосияи сеюми Маҷлиси вакилони халқи шаҳри Душанбе, даъвати ҳафтум баргузор шуд
«САЙРИ ДУШАНБЕ». Ба муносибати Рӯзи ҷаҳонии сайёҳӣ дар пойтахт хатсайри ройгон ташкил карда мешавад
Имрӯз иҷлосияи сеюми Маҷлиси вакилони халқи шаҳри Душанбе, даъвати ҳафтум баргузор мегардад
Дар Душанбе Рӯзи забони давлатӣ дар сатҳи баланд таҷлил карда мешавад
DITE-2025: Душанбе ба маркази нави сайёҳии байналмилалӣ табдил меёбад
DITE-2025. Зиёда аз 10 ҳазору 500 нафар аз Намоишгоҳи байналмилалии сайёҳии Душанбе дидан намуданд
Масъалаи густариши ҳамкорӣ байни шаҳри Душанбе ва Ҷазираи Киш дар соҳаи сайёҳӣ баррасӣ шуд