Се корманди телевизиони «Инъикос» дар ду ҳамлаи мусаллаҳона дар вилояти Нангарҳори Афғонистон кушта шуданд

Март 3, 2021 10:58

ДУШАНБЕ, 03.03.2021. /АМИТ «Ховар»/. Раиси радио ва телевизиони «Инъикос» мегӯяд, ки се корманди ин расона дар ду ҳодисаи ҷудогона дар шаҳри Ҷалолободи Афғонистон кушта шуданд, хабар медиҳад АМИТ «Ховар» бо истинод ба шабакаи телевизионии tolonews.com.

Залмай Латифӣ, раиси радио ва телевизиони «Инъикос» рӯзи  сешанбе, 02 март гуфт, ки дар натиҷаи ду ҳамлаи мусаллаҳона дар вилояти Нангарҳор се корманди зани ин расона кушта шуданд.

Ҷаноби Латифӣ афзуд, ки афроди мусаллаҳи номаълум тақрибан соати 16.00 дар ноҳияи якуми Ҷалолобод ду корманди шуъбаи дубляжи расона — Саъдия ва Шаҳнозро ҳадаф қарор доданд ва ҳарду дар беморхона ҷон бохтанд.

Вай афзуд, ки дар ҳамлаи мушобеҳ дар ҳавзаи чоруми Ҷалолобод Мурсал Ҳабибӣ, корманди дигари шуъбаи дубляжи расонаҳо низ ҷон додааст.

Дар ҳамин ҳол, табибони беморхонаи вилоятии Ҷалолобод мегӯянд, як зани роҳгузаре, ки зимни ин ҳамлаҳо маҷрӯҳ шудааст, барои табобат ба бемористон интиқол дода шудааст.

Вобаста ба ҳодисаҳои рухдода, раиси полиси Нангарҳор Ҷумъа Гул Ҳиммат гуфтааст, ки қотили Мурсал боздошт шудааст ва тафтишот идома дорад.

Ҳеҷ гурӯҳ ё шахсе масъулияти ҳамлаҳоро бар дӯш нагирифтааст.

Қобили қайд аст, ки тақрибан се моҳ пеш, Малолай Майванд, ровии телевизиони Reflection, дар як ҳамлаи мушобеҳ кушта шуда буд.

Ду ҳафта қабл Дафтари Созмони Милали Муттаҳид дар Афғонистон дар як гузориш гуфта буд, ки аз 12 сентябри соли 2020, яъне оғози музокироти сулҳ то 31 январи соли 2021, тақрибан 11 ҳомии ҳуқуқ ва корманди ВАО дар ҳамлаҳои ҳадафнок дар Афғонистон кушта шуданд.

Гузориш меафзояд, ки дар натиҷаи ин ҳамлаҳо, шумораи зиёди мутахассисони касбӣ аз таҳияи матолиби ҷиддӣ даст кашидаанд ва ё  тарки вазифа кардаанд ва аксари онҳо, аз ҷумла чеҳраҳои саршинос аз Афғонистон фирор карданд.

Дар байни ин 11 нафар панҷ ҳомии ҳуқуқ ва шаш корманди ВАО буданд, ки дар тӯли чор моҳи охир дар Афғонистон кушта шудаанд.

Гуфта мешавад, ки кушторҳо ба ҷомеа таъсири густарда доранд ва интизориҳои талошҳои сулҳро камтар мекунанд.

Бино ба гузоришҳо, куштори мақсадноки фаъолони ҷомеаи шаҳрвандӣ ва кормандони ВАО аз ҷониби гурӯҳҳои мусаллаҳи муташаккил ва гурӯҳи ба ном «Давлати исломӣ» (мамнуъ дар Тоҷикистон) бо истифода аз маводи тарканда ва силоҳ сурат гирифтааст.

Дар ин гузориш шумораи умумии қурбониёни ҳомиии ҳуқуқ ва кормандони ВАО аз 1 январи соли 2018 то 31 январи соли 2021 65 тан гуфта шудааст, ки 32 нафари онҳо кормандони ҳуқуқи башар ва 33 нафар кормандони ВАО мебошанд.

Март 3, 2021 10:58

Хабарҳои дигари ин бахш

Дар Тоҷикистон нақшаи даъвати баҳории ҷавонон ба хизмати ҳарбӣ 56 фоиз иҷро шуд
Рустам Назарзода бо Роҳбари Дафтари барномаҳои САҲА дар Душанбе ҳамоҳанг намудани ҳамкории минбаъдаро баррасӣ намуд
Дар Афғонистон 104 узви гурӯҳи «Толибон» кушта, 68 тани дигараш захмӣ карда шуданд
Дар вилояти Суғд мулоқоти вазирони корҳои дохилии Тоҷикистон ва Қирғизистон баргузор шуд
Сарбозони қисмҳои ҳарбии Тоҷикистон дар баробари хизмат касбу ҳунар меомӯзанд
Дар Тоҷикистон тамринҳои миқёсан васеи низомӣ баргузор мешаванд
Дар ҳудуди ноҳияи Ишкошим миқдори махсусан калони маводи мухаддир мусодира гардид
Дар Суғд гурӯҳи калони даъватшавандагон бо тантана ба хизмати ҳарбӣ фиристода шуданд
Дар Тоҷикистон иҷрои нақшаи даъвати баҳории ҷавонон ба хизмати ҳатмии ҳарбӣ ба 45 фоиз баробар шуд
«Ҳар он кас, ки шараф дорад, кабир аст…». Дар Турсунзода маъракаи даъвати наваскарон пурра анҷом ёфт
Сафари расмии Вазири мудофиаи Тоҷикистон Шералӣ Мирзо ба Ҷумҳурии Исломии Эрон
Бар асари таркиш дар Кобул як нафар ҳалок ва се тани дигар захмӣ шуданд

Маводҳои таҳлилӣ