Вазири кишоварзии ҶБ Иван Крупко: «Беларус ва Тоҷикистон лоиҳаҳоро дар соҳаи кишоварзӣ бояд фаъолонатар татбиқ кунанд»

Апрель 6, 2021 12:02

ДУШАНБЕ, 06.04.2021 /АМИТ «Ховар»/. Беларус ва Тоҷикистон бояд лоиҳаҳои мутақобилан судмандро дар соҳаи кишоварзӣ ва ҳамгироии  саноатӣ фаъолонатар татбиқ кунанд. Бино ба гузориши агентии хабаргузории давлатии Беларус БелТА, дар ин хусус вазири кишоварзӣ ва ғизои Беларус Иван Крупко дирӯз дар нишасти 14-уми Комиссияи байниҳукуматии Беларус ва Тоҷикистон оид ба ҳамкории тиҷоратӣ ва иқтисодӣ дар Душанбе ибрози назар кардааст.

«Дар айни замон, вазифаи мо — нигоҳ доштани ҳаракати мусбати тиҷорати мутақобила, афзоиш додани саҳми маҳсулоти илмталаб ва аз ҷиҳати технологӣ сатҳи баланд дар савдо, инчунин фаъолонатар татбиқ намудани лоиҳаҳои мутақобилан судманд, пеш аз ҳама, дар соҳаи кишоварзӣ ва кооператсияи саноатӣ иборат мебошад», — гуфт Иван Крупко.

Дар ҷаласа доираи васеи масъалаҳои ҳамкории дуҷонибаи тиҷоратӣ — иқтисодӣ муҳокима карда шуданд. Дурнамои ҳамкорӣ дар соҳаи ҳамкории саноатӣ, кишоварзӣ, тандурустӣ ва дорусозӣ ва танзими робитаҳои мустақим байни доираҳои тиҷоратӣ баррасӣ шуданд. Бори аввал масъалаҳои ҳамкории иттилоотӣ ба протоколи комиссия дохил карда шуданд.

Сарфи назар аз зуҳуроти буҳрон дар ҷаҳон, ҳамкории тиҷоратӣ ва  иқтисодии Беларус ва Тоҷикистон хусусияти мусбат ва фаъол нишон медиҳад. Аз соли 2016 ҳаҷми мутақобилаи муомилоти молӣ 5,5 маротиба афзуд ва соли 2020 111,7 миллион долларро ташкил дод. Беларус ва Тоҷикистон барои густариши минбаъдаи ҳамкории муассир имкон доранд ва дар ин самт кори муштаракро идома бояд дод.

Дар давраи сипаришуда бо талошҳои муштарак якчанд лоиҳаҳои назаррас татбиқ карда шуданд. Аз ҷумла, соли 2019 дар Беларус заминаи бунёди боғҳои Дӯстӣ бо ниҳолҳои Тоҷикистон гузошта шуд. Соли гузашта корҳои таҷрибавӣ оид ба парвариши дарахтҳои мевадиҳандаи Тоҷикистон (ангур, чормағз) дар кишвар идома ёфт.

Татбиқи қарордоди калон барои интиқоли 100 троллейбуси худрав ба Душанбе дар арафаи анҷомёбист. Соли 2020 нахустин гурӯҳи тракторҳои МТЗ аз корхонаи васлкунӣ дар Ҳисор ба Афғонистон фиристода шуданд. Лоиҳаи муштараки Беларус ва Тоҷикистон дар Ҳисор намунаи ҳамкории муваффақ дар соҳаи корҳои саноатӣ мебошад. Дар корхонаи васлкунӣ на танҳо истеҳсоли таҷҳизоти муосир барои комплекси агросаноатии Тоҷикистон ба нақша гирифта шудааст, балки бо дарназардошти рушди минбаъдаи лоиҳа инчунин таъсиси зиёда аз 100 ҷойи кори ихтисосӣ пешбинӣ шудааст.

Яке аз масъалаҳои мубрам барои Тоҷикистон баланд бардоштани сатҳи тайёрии кадрҳо мебошад. Дар вохӯрӣ оид ба рушди минбаъдаи ҳамкорӣ байни мактабҳои олӣ, ҷалби шаҳрвандони Тоҷикистон ба Беларус барои таҳсил, бозомӯзӣ ва такмили ихтисос мувофиқа ҳосил шуд.

Ғайр аз ин, имконоти ҷиддӣ дар ҳамкории фаъолтар дар самти палатаҳои савдо ва саноат дида мешавад. Масалан, дар доираи комиссияи байниҳукуматӣ 6-7 апрели соли 2021 дар Душанбе намоишгоҳи истеҳсолкунандагони Беларус “Made in Belarus”, Форуми тиҷоратии “Беларус-Тоҷикистон- Афғонистон”, Форуми кишоварзии “TajikBelAgro”, инчунин гуфтушунидҳои тиҷоратӣ байни намояндагони соҳибкорон баргузор мешаванд. Таркиби сершумори ҳайати соҳибкорони Беларус ва мавқеи фаъоли палатаҳои савдо ва саноати Беларус ва Тоҷикистон аз имконоти баланди ҳамкории тиҷоратӣ шаҳодат медиҳанд. Ба нақша гирифта шудааст, ки намоишгоҳи Беларус муваффақияти густурда хоҳад дошт ва  музокироти тиҷоратӣ ба маросими бастани созишномаҳо ва шартномаҳои тиҷоратии мушаххас табдил хоҳанд ёфт.

«Мо инчунин аз ҳамкорӣ байни минтақаҳои кишварҳоямон, аз ҷумла дар заминаи муносибатҳои тиҷоративу иқтисодӣ фоидаи назаррасро интизор дорем. Ба таркиби ҳайати Беларус роҳбарияти вилояти Гомел ва намояндагони доираҳои соҳибкории минтақа шомил мебошанд. Дар барномаи боздиди ҳайат сафар ба вилояти Хатлон — минтақаи аграрӣ ва саноатии Тоҷикистон ба нақша гирифта шудааст. Мо интизори  музокироти созанда дар ин самт бо шарикони тоҷикамон мебошем», — иброз дошт Иван Крупко.

                                              Аксҳо аз  CTV.BY, АМИТ «Ховар»

Апрель 6, 2021 12:02

Хабарҳои дигари ин бахш

Татбиқи «Барномаи рушди иҷтимоию иқтисодии шаҳри Турсунзода барои солҳои 2020-2025» баррасӣ шуд
ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. ҶДММ «Панҷрӯд Панҷ» ба парвариши 22 ҳазор сар «Хайсес ҳувайт» машғул аст
Сафири Франсия дар Тоҷикистон аз МОИ «Кӯлоб» боздид намуд
Дар Тоҷикистон истеҳсоли маҳсулоти саноатӣ дар 3 моҳ 17,4% зиёд шуд
Вазорати меҳнати Тоҷикистон: дар маълумоти Вазорати корҳои дохилии Россия шумораи муҳоҷирони тоҷик зиёдтар нишон дода шудааст
Тоҷикистон ва Туркия метавонанд ҳаҷми табодули молро то ба 1 миллиард доллар расонанд
Имсол дар вилояти Суғд дар 178 ҳазор гектар зироати баҳорӣ мекоранд
Дар Душанбе масъалаи ҷалби сармоя ба рушди инфрасохтори сайёҳии Тоҷикистон бо гурӯҳи сармоягузорони Россия баррасӣ гардид
Марҳилаи якуми сохтмони роҳи мошингарди Обигарм-Нуробод оғоз мегардад
Дар Тоҷикистон бори аввал дар 15 соли охир ҳаҷми содирот аз воридот бештар шуд
Раиси вилояти Хатлон ва Сафири Франсия дар Тоҷикистон роҳандозии ҳамкории доираҳои тиҷоратиро баррасӣ намуданд
Вазири нақлиёт бо муовини директори Депортаменти инфрасохтори Агентии ҳамкории байналмилалии Ҳукумати Япония (JICA) мулоқот намуд

Маводҳои таҳлилӣ