25 нафар занону духтарони ВМКБ ба курси «Зан – сарвар» ҷалб гардиданд

Май 8, 2022 09:34

ДУШАНБЕ, 08.05.2022 /АМИТ «Ховар»/. Дар шаҳри Хоруғи Вилояти Мухтори Кӯҳистони Бадахшон бо ташаббуси Академияи идоракунии давлатии назди Президенти Ҷумҳурии Тоҷикистон дар ҳамкорӣ бо Бунёди Ҳаннс Зайдели Олмон таҳти унвони «Зан — сарвар» курси омӯзиши дуалӣ барои тайёр кардани ҳайати бонувони роҳбарикунанда аз ҳисоби хизматчиёни давлатӣ баргузор шуд, хабар доданд ба АМИТ «Ховар» дар Академияи идоракунии давлатӣ.

Дар курси мазкур ректори Академияи идоракунии давлатӣ Абдухалил Ғафурзода иброз дошт, ки “ҷалби ҳарчи бештари занону духтарон ба вазифаҳои роҳбарикунанда, инчунин беҳтар намудани шароити фаъолияти онҳо аз солҳои аввали соҳибистиқлолии мамлакат ҳамеша дар маркази таваҷҷуҳи Пешвои миллат муҳтарам Эмомалӣ Раҳмон ва Ҳукумати кишвар қарор дорад. Аз ин рӯ, Ҳукумати Ҷумҳурии Тоҷикистон бо дарназардошти воқеияти сиёсӣ, иқтисодӣ ва хусусияти фарҳангиву суннатӣ шаклҳои муайяни беҳбуд бахшидани вазъи иҷтимоии занонро ба миён гузоштааст. Курси мазкур дар асоси дастуру ҳидоятҳои Пешвои миллат муҳтарам Эмомалӣ Раҳмон ба Маҷлиси Олӣ роҳандозӣ гардида, дар он занону духтарони то 40-сола, ки дар мақомоти маҳаллӣ фаъолият доранд, ҷалб карда мешаванд”.

Мавсуф афзуд, ки «бо мақсади таъмини иштироки ҳарчи бештари занон дар ҳама соҳаҳои хоҷагии халқи мамлакат ва ҷалби онҳо ба идоракунии давлатӣ, мақомоти қонунгузори мамлакат то ба имрӯз як қатор санадҳои меъёриву ҳуқуқиро қабул намудааст, ки онҳо барои баланд бардоштани мақом ва манзалати зан дар бунёди ҷомеаи демократӣ нақши муҳим мебозанд. Академияи идоракунии давлатии назди Президенти Ҷумҳурии Тоҷикистон ҷиҳати иҷрои дастуру супоришҳои Пешвои миллат ва Ҳукумати мамлакат барои дар амал татбиқ намудани «Барномаи давлатии тарбия, интихоб ва ҷобаҷогузории кадрҳои роҳбарикунандаи Ҷумҳурии Тоҷикистон аз ҳисоби занону духтарони лаёқатманд барои солҳои 2017-2022» марҳила ба марҳила тадбирҳои судманд роҳандозӣ менамояд».

Ҳамоҳангсози курси мазкур Исматуллои Шерхон иттилоъ дод, ки дар ба ин курс 25 нафар занону духтарон аз шаҳру ноҳияҳои ВМКБ ҷалб гардида, дар 3 давра таҳсил намуда, ба таҷрибаомӯзӣ сафарбар мешаванд. Инчунин дар анҷоми курс шунавандагон аз рӯи барномаи «Зан — сарвар» соҳиби диплом мегарданд, ки дар оянда ҷиҳати болоравии мансабии онҳо нақши муҳим хоҳад бозид.

Мавриди зикр аст, ки курси омӯзиши дуалии «Зан — сарвар» барои хизматчиёни давлатӣ аз ҳисоби занон аз соли 2020 оғоз гардида, дар ин давра 128 нафар шунаванда аз вилоятҳои ВМКБ, Суғду Хатлон ва шаҳру ноҳияҳои тобеи ҷумҳурӣ ҷалб гардидаанд.

Ҳадаф аз баргузории курсҳо- мусоидат намудан ба азхуднамоии донишҳои зарурӣ оид ба тарзу усулҳои нави идоракунии давлатӣ ва таъмини баробарии гендерӣ мебошад.

АКС: Академияи идоракунии давлатии назди Президенти ҶТ

Май 8, 2022 09:34

Хабарҳои дигари ин бахш

Дар ноҳияи Кӯшониён пули дарозиаш 85-метра ба истифода дода шуд
Корҳои кашидани хатти оби нушокӣ аз деҳаи Калтачинор ба маркази ноҳияи Балҷувон оғоз гардиданд
Ба Тоҷикистон беш аз 200 ҳазор воя ваксинаи намуди «Pfizer» ворид карда шуд
Ҳайати Тоҷикистон дар ҷаласаи коршиносони байналмилалӣ дар Истанбул иштирок намуд
«МАКТАБИ СИЁСИИ ПЕШВОИ МИЛЛАТ». Назаре ба кори Конференсияи байналмилалии илмию амалӣ бахшида ба 25-солагии Ваҳдати миллӣ
Шабнам Раҳимзода, муовини якуми Раиси Кумитаи кор бо ҷавонон ва варзиш: «Ваҳдати миллӣ табассуми гумшудаи модари тоҷикро дубора баргардонд»
Раиси КИ ҲХДТ дар ноҳияи Фирдавсӣ: «Аз заиф будани ваҳдати миллӣ дар Афғонистон зиёда аз чор даҳсола аст, ки онҳо ба сулҳу субот намерасанд»
АГЕНТИИ ОБУҲАВОШИНОСӢ ХАБАР МЕДИҲАД: Аз 27 то 30 июн дар Тоҷикистон ҳарорати рӯзонаи ҳаво баланд мешавад
Дар шаҳри Гулистон таҳти унвони «Эмомалӣ Раҳмон – меъмори давлати миллии тоҷикон» конференсия доир шуд
«Ба қадри сулҳу оромии Тоҷикистон бирасем!»,- бардошт аз конференсия дар Кумитаи забон ва истилоҳот
ҲХДТ бахшида ба 25-солагии Рўзи Ваҳдати миллӣ дар Бохтар Конфронси байналмилалии илмӣ-амалӣ доир намуд
Дар Душанбе Фестивал-намоиши «Таомҳои миллӣ» баргузор гардид