Ҳамкории Тоҷикистон ва Бонки ҷаҳонӣ вобаста ба тағйирёбии иқлим таҳким меёбад

Ноябрь 14, 2022 16:00

ДУШАНБЕ, 14.11.2022 /АМИТ «Ховар»/. Дар ҳошияи Конфронси 27-уми ҷонибҳои Конвенсияи қолабии Созмони Милали Муттаҳид оид ба тағйирёбии иқлим (КОП-27) дар шаҳри Шарм-уш-Шайхи Миср Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода бо директори минтақавии Бонки ҷаҳонӣ оид ба рушди устувор барои кишварҳои Аврупо ва Осиёи Марказӣ Самеҳ Ваҳба вохӯрда, масъалаи таҳкими ҳамкориро баррасӣ намуд. Дар ин бора АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ медиҳад.

Баҳодур Шерализода доир ба раванди ҳамкорӣ ва татбиқи лоиҳаҳо дар самти тағйирёбии иқлим, беҳтарсозии хизматрасонии обуҳавошиносӣ ва устувории ландшафтҳо изҳори қаноатмандӣ намуда, барои дастгирии Бонки ҷаҳонӣ дар татбиқи сиёсати Ҳукумати Ҷумҳуриии Тоҷикистон вобаста ба масъалаҳои муҳити зист ва тағйирёбии иқлим изҳори сипос намуд.

Самеҳ Ваҳба оид ба барномаҳои Бонки ҷаҳонӣ барои дастгирии кишварҳо дар ҳоли рушд дар самти мутобиқшавӣ ба тағйирёбии иқлим ва коҳиши таъсири манфии он ба иқтисодиёти давлатҳо дар ҳоли рушд маълумот пешниҳод намуд. Зикр шуд, ки аз ҷониби Бонки ҷаҳонӣ соли 2021 Нақшаи амал оид ба тағйирёбии иқлим барои 5 сол қабул гардидааст, ки дар доираи он таҳия ва татбиқи лоиҳаҳо дар самтҳои мутобиқшавӣ ба тағйирёбии иқлим ва коҳиши пайомадҳои манфии он пешбинӣ шудааст.

Бо мақсади ноил гардидан ба ҳадафҳои асосии Ҷумҳурии Тоҷикистон, ки дар стратегия ва барномаҳои миллӣ дар самти беҳтар намудани хизматрасониҳои обуҳавошиносӣ муайян гардидаанд, аз ҷониби Раиси Кумитаи ҳифзи муҳити зист пешниҳод гардид, ки масъалаи ҷудо намудани маблағҳои иловагӣ дар доираи Лоиҳаи «Навсозии хизматрасонии обуҳавошиносӣ дар Осиёи Марказӣ (маблағгузории иловагӣ), ҷузъи С» баррасӣ шавад.

Инчунин масъалаи расонидани кумаки техникӣ дар самти мониторинги ҳавои атмосфера мавриди муҳокима қарор гирифт. Баҳодур Шерализода бо мақсади татбиқи саҳми дар сатҳи миллӣ муайяншудаи Тоҷикистон оид ба коҳиши ихроҷи газҳои гулхонаӣ Бонки ҷаҳониро барои дастгирии татбиқи санади мазкур даъват намуд.

Раиси Кумита Самеҳ Ваҳбаро барои боздид аз Тоҷикистон дар вақти барояш муносиб даъват кард ва ӯ онро қабул намуд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон

 

Ноябрь 14, 2022 16:00

Хабарҳои дигари ин бахш

Дар Бонки миллии Тоҷикистон масъалаи муқовимат ба қонунигардонии даромадҳои бо роҳи ҷиноят бадастоварда баррасӣ гардид
Аз ҷониби Фонди иқлими сабз маблағгузории лоиҳаи CASP+ дар Тоҷикистон дастгирӣ ёфт
Тоҷикистону Бангладеш гардиши савдоро байни ҳам бамаротиб зиёд мекунанд
Дар Душанбе ҷаласаи навбатии Комиссияи муштараки байниҳукуматии Тоҷикистон ва Қазоқистон оид ба ҳамкории иқтисодӣ баргузор шуд
МАСЛИҲАТИ МУТАХАССИС. Пиёзро чӣ тавр барои зимистон захира намоем?
Роҳбарияти шаҳри Ҳисор бо вазъи корҳои саҳро дар хоҷагиҳои кишоваразии Ҷамоати деҳоти Навобод шинос гардид
IRS: Нуқтаҳои вазнченкунӣ вайроншавии роҳро пешгирӣ мекунанд
ҚУРБИ АСЪОР: 1 рубли русӣ аз 0.1211 то 0.1220 сомонӣ муқаррар шудааст
Дар Панҷакент Форуми минтақавии саводнокии молиявӣ баргузор шуд
Шурои Фонди иқлими сабз аккредитатсияи Маркази татбиқи лоиҳаҳои сармоягузории Кумитаи ҳифзи муҳити зистро тасдиқ намуд
Бонки ҷаҳонӣ: «Иқтисоди Тоҷикистон солҳои охир ба таври назаррас рушд ёфтааст»
Дар Душанбе таҳкими ҳамкории сармоягузорӣ ва рушди соҳибкорӣ байни Тоҷикистон ва Бангладеш баррасӣ шуд