Ҳайати Тоҷикистон дар Конфронси сатҳи баланд дар Тошканд дар масъалаи тағйирёбии иқлим иштирок намуд

Декабрь 8, 2022 09:03

ДУШАНБЕ, 08.12.2022 /АМИТ «Ховар»/. Ҳайати Тоҷикистон таҳти сарварии муовини якуми Раиси Кумитаи ҳолатҳои фавқулода ва мудофиаи граждании кишвар Ҳотамшо Латифзода дар Конфронси сатҳи баланд оид ба тағйирёбии иқлим: «Аз донишҳои глобалӣ ба ҳалли маҳаллӣ: муассисаҳои ба иқлим тобовар дар Осиёи Марказӣ», ки дар шаҳри Тошканди Ҷумҳурии Узбекистон баргузор гардид, иштирок намуд. Дар ин бора ба АМИТ «Ховар» дар Кумитаи ҳолатҳои фавқулода ва мудофиаи гражданӣ хабар доданд.

Ҳотамшо Латифзода иброз дошт, ки «мо дар давраи тағйирёбии иқлим зиндагӣ дорем, ки ба ҳама таъсир мерасонад. Тағйирёбии иқлим- ин таҳдид ва боз суръатбахши ҳамкории ҷаҳонӣ мебошад. Он ба ваҳдати мардум ва ҳамкорӣ дар самти рушди устувори ҷаҳонӣ бо дарназардошти мутобиқшавӣ ба тағйирёбии иқлим мусоидат мекунад».

Бояд гуфт, ки ба ҳайати Тоҷикистон намояндагони Кумитаи ҳифзи муҳити зист, Агентии беҳдошти замин ва обёрӣ, Вазорати кишоварзӣ, Вазорати энергетика ва захираҳои об, Агентии обуҳавошиносӣ, Вазорати корҳои хориҷӣ ва Мақомоти иҷроияи ҳокимияти давлатии вилояти Суғд шомил мебошанд.

Дар конфронс беш аз 140 намоянда аз кишварҳои Осиёи Марказӣ ширкат варзиданд. Онҳо зимни суханрониҳо ба фаъол будан дар муколама оид ба таҳдидҳои иқлимӣ, инчунин муттаҳид кардани неруҳо барои ноил шудан ба тавозуни оқилонаи коҳиш додани тағйирёбии иқлим ва мутобиқшавӣ ба он даъват карданд.

Конфронс аз ҷониби Барномаи Рушди СММ, Иттиҳоди Аврупо ва ҳукумати Олмон (GIZ) ташкил ва гузаронида шуд.

Иҷлосияи аввали умумӣ ба тадбирҳои баланд бардоштани устуворӣ ба тағйирёбии иқлим ва офатҳои табиӣ дар Осиёи Марказӣ бахшида шуд. Иштирокчиён дар бораи сиёсати иқлимии кишварҳои Осиёи Марказӣ дар робита ба хатарҳои амниятии марбут ба тағйирёбии иқлим изҳори назар намуданд.

Дар нишасти дуюми умумӣ оид ба робитаи «Об-энергетика-озуқаворӣ-тандурустӣ» барои ноил шудан ба Ҳадафҳои Рушди устувор иштирокчиён доираи чорабиниҳоро оид ба татбиқи мутобиқшавӣ ба тағйирёбии иқлим, чораҳои коҳиш додани хатарҳо ва баланд бардоштани устувории иқлим дар истифодаи об ва замин дар панҷ кишвари Осиёи Марказӣ баррасӣ карданд. Мавзӯи асосии ҷаласаи сеюми умумӣ шарикӣ ва табодули минтақавӣ тавассути ҷалби ҳукуматҳои миллӣ ва ниҳодҳои байниҳукуматии минтақавӣ ва платформаҳо дар минтақа буд.

Иштирокчиён зикр намуданд, ки бо дарназардошти хусусияти хатарҳои иқлимӣ ва захираҳои табиии муштарак амал барои мубориза бо тағйирёбии иқлимро метавон ҳамчун нуқтаи ибтидоии таҳкими ҳамкории минтақавӣ арзёбӣ кард. Дар солҳои охир кишварҳои Осиёи Марказӣ – Тоҷикистон, Узбекистон, Қазоқистон, Қирғизистон ва Туркманистон дар самти мутобиқшавӣ ба тағйири иқлим ва ноил шудан ба рушди сабз дар асоси сармояи табиӣ ба пешравиҳои назаррас ноил гардиданд. Онҳо ба ташаббуси таъсиси ҳамкории байнисоҳавӣ оид ба коҳиш додани тағйирёбии иқлим, мутобиқшавӣ ва устувории иқлим дар идоракунии захираҳои табиӣ пайвастанд ва онро пуштибонӣ намуданд.

АКС: КҲФ ва МГ

Декабрь 8, 2022 09:03

Хабарҳои дигари ин бахш

ПАЁМ-АСОСИ РУШДИ ҶОМЕА. Андешаҳои Сардори Хадамоти иҷрои назди Ҳукумати Ҷумҳурии Тоҷикистон дар ин хусус
НИШАСТИ МАТБУОТӢ. Маркази тадқиқоти стратегии Тоҷикистон бо 50 маркази тадқиқотии давлатҳои хориҷӣ ҳамкорӣ мекунад
Кумитаи телевизион ва радио барои кормандон бинои истиқоматии дорои 144 ҳуҷра бунёд мекунад
Дар Шаҳринав марҳилаи дуюми сохтмони бинои Маркази омода намудани наҷотдиҳандагон оғоз меёбад
Сокинони шаҳри Кӯлоб бо барқ ва оби ошомиданӣ таъминанд
Дар километри 62-юми роҳи Душанбе-Чаноқ тарма фаромада, ҳаракати нақлиёт маҳдуд карда шуд
ДАСТГИРИИ НИЁЗМАНДОН. Ба беш аз 200 ҳазор нафар нафақагирон кумакҳои яквақта пардохт карда шуданд
Агентии миллии иттилоотии Тоҷикистон «Ховар» бо ҷоизаи «Беҳтарин муассисаи тарғиботӣ дар соли 2022» сарфароз гардонида шуд
ТАВАҶҶУҲ! Шаҳрвандони Тоҷикистон бояд то 15 феврал симкортҳои худро тибқи шиносномаи намунаи соли 2014 дубора ба қайд гиранд
Байни Тоҷикистон ва Малайзия ҳамкории илмию таҳқиқотӣ густариш меёбад
БАДАХШОН-ДАРВОЗАИ ТИЛЛОИИ ТОҶИКИСТОН. Ба истиқболи 35-солагии Истиқлоли давлатӣ бунёди беш аз 1000 иншоот дар назар аст
Имрӯз дар Душанбе маросими ҷоизасупории соҳаи кор бо ҷавонон дар соли 2022 баргузор шуд