Нашриёти «Ирфон» таҳти унвони «Хуни ориёӣ» китоб ба нашр расонид

ДУШАНБЕ, 17.07.2023 /АМИТ «Ховар»/. Муассисаи нашриявии «Ирфон» таҳти унвони «Хуни ориёӣ» китоби адиби шинохтаи тоҷик Саидмурод Рабизодаро аз чоп баровард.

Мазмуну муҳтавои китоби «Хуни ориёӣ» аз ҳаёти одамони даврони муосир гирифта шуда, симои онҳо ба таври воқеӣ тасвир шудааст. Қаҳрамонҳои асар ҳар яке дар зиндагӣ мавқеъ ва роҳи худро соҳиб гардидаанд. Ҳангоми мутолиаи ин китоб ба хонандаи нуктасанҷ маълум мешавад, ки инсон, қабл аз ҳама, бояд аз асли хеш бохабар бошад. Донад, ки гузаштагонаш киҳо буданд, мавқеъ ва амалашон дар зиндагӣ аз чиҳо иборат буд. Қаҳрамонҳои асосии китоби таърихии «Хуни ориёӣ» одамони касбу кори гуногун- роҳбар, роҳнамо, муаллим, мулло, чӯпон, подабон, коргар, корманд, муҳандис, вакили халқ, тоҷир, нафақахӯр, журналист, ангишткан ва ғайра буда, онҳо хонандаро дар зиндагӣ ба рафтори нек, гуфтори нек ва кирдори нек талқин менамоянд.

Муҳаррири китоби таърихии «Хуни ориёӣ» директори Муассисаи нашриявии «Ирфон», номзади илмҳои педагогӣ Қурбон Ғуломзода буда, он аз сарсухан ва силсиламақолаҳои «Панҷаи тақдир», «Тири ҳадафрас», «Мурдаҳои зиндашуда», «Дулонадуздон», «Фоҷиаи Як-40», «Сӯзиши дил», «Ситоиши модар», «Дуздӣ дар маҳтобшаб», «Хуни ориёӣ» ва «Як лаҳзаи нотакрори зиндагӣ» иборат мебошад.

Китоби «Хуни ориёӣ» идомаи асарҳои нависанда Саидмурод Рабизода «Ҳамосаи ҷавонмардӣ», «Шаҳиде дар роҳи ҳақиқат», «Саодати истиқлол», «Матонат ва ҷасорат», «Ташаккули мафкура», «Сӯзиши дил», «Панҷаи тақдир» ва «Марде собит ҳамчун кӯҳ» буда, одамонро ба меҳнатдӯстӣ, сидқан дӯст доштани Ватан-Модар, расидан ба қадри истиқлоли Тоҷикистон, арҷгузорӣ ба заҳмати инсонҳо, эҳтироми якдигар, ҷавонмардию далерӣ, росткорӣ ва пайравӣ ба амалҳои неки ниёгони хеш раҳнамун месозад.

Аснои мутолиаи китоби «Хуни ориёӣ» хонанда як лаҳза сукут намуда, ба худ суол мегузорад, ки инсон кист? Ӯ бояд дар тӯли зиндагии худ кадом корҳоро ба анҷом расонад? Қадру қимати инсонҳо дар чӣ зоҳир мегардад? Дар зиндагӣ чӣ гуна метавон мавқеи худро пайдо намуд?
Мутолиаи китоби «Хуни ориёӣ» ба хонанда таассуроти ибратбахшу пандомез ва ғизои баланди маънавӣ мебахшад.

Саидмурод Рабизода муаллифи китобҳои «Ҳамосаи ҷавонмардӣ» (соли 1998), «Шаҳиде дар роҳи ҳақиқат» (соли 2014), «Саодати истиқлол» (соли 2016), «Матонат ва ҷасорат» (соли 2015), «Ташаккули мафкура» (соли 2017), «Сӯзиши дил» (соли 2015), «Панҷаи тақдир» (соли 2018), «Марде собит ҳамчу кӯҳ» (соли 2016), «Нолаҳои вопасини модар» (соли 2016) ва чандин филмномаю намоишҳои гуногуни телевизионӣ, ба мисли «Тавзеҳ», «Масъулият», «Нурофарон», «Дурнамо», «Азҳар» ва ғайраҳо мебошад.

   АКС: АМИТ «Ховар»