Ҷаласаи навбатии Шурои ҳамоҳангсозии фаъолияти мақомоти ҳифзи ҳуқуқ ва идоракунии ҳарбӣ баргузор гардид

ДУШАНБЕ, 26.08.2024 /АМИТ «Ховар»/. Дар Сарпрокуратураи ҳарбии Ҷумҳурии Тоҷикистон ҷаласаи навбатии Шурои ҳамоҳангсозии фаъолияти мақомоти ҳифзи ҳуқуқ ва идоракунии ҳарбӣ баргузор гардид, ки дар он вазъи содиршавӣ, пешгирӣ, ошкоркунӣ ва амалияи тафтишотӣ–судӣ бо ҷиноятҳои азонихудкунӣ ё исрофкорӣ баррасӣ карда шуд. Дар ин хусус ба АМИТ «Ховар» дар Вазорати мудофиаи ҷумҳурӣ хабар доданд.

Дар ҷаласа ҳайатҳои роҳбариву фармондеҳии Вазорати мудофиа, Кумитаи ҳолатҳои фавқулода ва мудофиаи гражданӣ, Агентии таъминоти амволи махсус, ҳайати фармондеҳии қӯшунҳои сарҳадӣ, Қӯшунҳои дохилӣ, Гвардияи миллӣ, масъулони раёсатҳои молия ва буҷет, корҳои сиёсию тарбиявӣ, ақибгоҳ, комиссарони ҳарбӣ, командирони қисмҳои ҳарбӣ ва прокуророни ҳарбии гарнизонҳо иштирок карда, ибрози назар намуданд.

Талаботи қонуну оинномаҳо дар вазорату идораҳои ҳарбӣ, навъи қӯшунҳо ва қисмҳои ҳарбӣ дар ин самт иҷро шуда, дар маҷмуъ барои  даромад ва хароҷоти мақсадноки маблағҳои пулӣ ва амволи махсус бобати таъмини хизматчиёни ҳарбӣ корҳои муайян анҷом дода шуданд.

Новобаста ба ин, талаботи қонунҳо доир ба масъалаҳои гуфташуда дар баъзе маврид ба таври дахлдор иҷро нашуда, сабабу шароите, ки ба содиршавии ҷиноят мусоидат мекунанд, пурра бартараф карда намешаванд. Дар робита ба ин нисбат ба якчанд нафар масъулони сохторҳои ҳарбӣ, ки даст ба чунин кирдор задаанд, парвандаҳои ҷиноятӣ оғоз ва тафтиш шуда, бо ҳукми суд шахсони гунаҳкор ба ҷазо маҳкум карда шуданд.

Дар ҷаласаи шуро масъулони сохторҳои ҳарбӣ муваззаф карда шуданд, ки талаботи қонунҳоро бечунучаро риоя намоянд. Дар доираи талаботи қонунҳо масъалаи ба амал баровардани вазифаҳои хизматӣ, пурра даромаду хароҷот кардани маблағҳои буҷетӣ, маводи озуқаю амволи шайъӣ ва дигар намуди амвол, инчунин ба вазифаи сардорони хадамоти молияю хӯрокворӣ, амволи шайъӣ, мудирони анбор ва ошпазҳо таъйин намудани занон–хизматчиёни ҳарбӣ низ баррасӣ шуд.

АКС: Вазорати мудофиаи Ҷумҳурии Тоҷикистон