Дар Вазорати мудофиаи Тоҷикистон оид ба ҷамъбасти даъвати тирамоҳӣ ҷаласа баргузор гардид

Декабрь 20, 2024 14:22

ДУШАНБЕ, 20.12.2024 /АМИТ «Ховар»/. Бо мақсади таҳлил ва ҷамъбасту натиҷагирӣ намудани фаъолияти мақомоти масъули даъват ва комиссариатҳои ҳарбии вилоятҳо ва шаҳру навоҳии мамлакат дар Вазорати мудофиаи Ҷумҳурии Тоҷикистон ҷаласа баргузор гардид. Дар ин хусус ба АМИТ «Ховар» дар Вазорати мудофиаи ҷумҳурӣ хабар доданд.

Зимни ҷаласа фаъолияти комиссариатҳои ҳарбӣ, монеаву мушкилот ва натиҷаҳои кори масъулине, ки ба ин маъракаи муҳими сиёсӣ вобаста буданд, мавриди баррасӣ қарор гирифт.

Ҳамасола дар Ҷумҳурии Тоҷикистон дар ду мавсим-баҳорӣ ва тирамоҳӣ даъвати ҷавонписарони аз 18 то 27-сола ба хизмати ҳатмии ҳарбӣ пешбинӣ гардидааст. Шаҳрвандон дар асоси талаботи Қонуни Ҷумҳурии Тоҷикистон «Дар бораи уҳдадории ҳарбӣ ва хизмати ҳарбӣ» ба сафи Қувваҳои Мусаллаҳи мамлакат дохил карда мешаванд.

Ин навбат низ давоми моҳҳои октябр ва ноябри соли равон даъвати тирамоҳии шаҳрвандон ба хизмати ҳатмии ҳарбӣ чун даъвати баҳории имсола пеш аз муҳлат ва дар сатҳи зарурӣ ба анҷом расид.

Дар ҷаласа масъулини чанд раёсати дахлдори ин ниҳоди қудратӣ доир ба вазъи қонунияту тартиботи ҳуқуқӣ, пешгирӣ аз сатҳи содиршавии ҷинояту қонуншиканӣ, сифати даъвати тирамоҳии шаҳрвандон ба хизматӣ ҳарбӣ, пешравию камбудиҳои ҷойдошта, амалан татбиқ намудану тақвият бахшидани машғулияти омодагии сафарбарӣ ва мудофиаи ҳудудӣ, ташкили машғулияти пайвастаи соҳавӣ, ҷобаҷогузории кадрҳои кордону лаёқатманд дар комиссариатҳои ҳарбӣ ва беҳдошти вазъи даъват дар солҳои минбаъда таклифу пешниҳоди ҳалталаб манзур намуданд.

Баъд аз баррасии масъалаҳо вобаста ба натиҷаҳои даъвати тирамоҳии шаҳрвандон ба хизмати ҳарбӣ Вазири мудофиаи Ҷумҳурии Тоҷикистон Шералӣ Мирзо оид ба дастуру супоришҳои Президенти Ҷумҳурии Тоҷикистон-Сарфармондеҳи Олии Қувваҳои Мусаллаҳи Тоҷикистон, генерали артиш муҳтарам Эмомалӣ Раҳмон дар самти андешидани татбирҳои зарурӣ барои боз ҳам баланд бардоштани қудрати дифоии мамлакат, сифатан хуб гузаронидани чорабиниҳои даъватӣ, пуррагардонии сафҳои артиш бо ҷавонписарони солиму бардам ва ислоҳи камбудиҳои ҷойдошта ибрози назар карда, шахсони мутасаддии ин чорабинии муҳими сиёсиро бо супоришҳои мушаххас вазифадор намуд.

Таъкид шуд, ки масъулини дахлдор дар навбати аввал ҳамкориро бо мардум ва аҳли ҷомеа боз ҳам вусъат бахшида, дар ҳамоҳангӣ бо мақомоти дахлдори шаҳрию ноҳиявӣ ба масъалаи омӯзиши шахсияти даъватшавандаҳо ва ба қайди ҳарбӣ гузоштани онҳо таваҷҷуҳи ҷиддӣ зоҳир кунанд, тамоми камбудиҳои ҷойдоштаро дар муҳлатҳои муайяншуда пурра бартараф карда, самтҳои фаъолияти соҳавии худро боз ҳам таҳким бахшанд. Муҳимтар аз ҳама, нисбат ба иҷрои вазифаю уҳдадориҳои хизматӣ бо масъулияти баланд муносибат намоянд.

Дар ҷараёни вазифагузорӣ ба масоили муайян ва мушаххас намудани шумораи захираҳои сафарбарӣ таваҷҷуҳи ҳамаҷониба зоҳир гардид. Супориш дода шуд, ки бо мақомоти иҷроияи ҳокимияти давлатии шаҳру ноҳияҳо барои таъмини ҳайати қувваҳои эҳтиётӣ бо лавозимоти зарурӣ фавран тадбирҳои бетаъхир андешанд.

Дар ҷамъомад комиссарони ҳарбие, ки дар даъвати тирамоҳии соли равон нақшаи пешбинигардидаро дар доираи талабот ва сатҳу сифати зарурӣ ба анҷом расониданд, бо Ифтихорнома ва Сипоснома сарфароз гардонида шуданд.

Ҳамзамон масъулини комиссариатҳои ҳарбие, ки зимни ташкили ин чорабинии муҳими сиёсӣ баръакс ба камбудиҳои ҷиддӣ роҳ дода, хунукназарӣ зоҳир намуданд, ба ҷазои интизомӣ кашида шуданд.

АКС: Вазорати мудофиаи Ҷумҳурии Тоҷикистон

Декабрь 20, 2024 14:22

Хабарҳои дигари ин бахш

Вобаста ба тақвияти ҳамкории ҷомеа бо мақомоти корҳои дохилӣ ҳамоиши илмӣ-амалӣ доир шуд
«ШАҲРИ ҲУШМАНД» ВА «ШАҲРИ БЕХАТАР». Соли 2024 чӣ қадар қоидавайрокунӣ сабт намуданд?
Тавсеаи ҳамкории Тоҷикистон бо Дафтари зиддитеррористии СММ дар доираи «Раванди Душанбе» баррасӣ гардид
Дар шаҳри Хуҷанд лоиҳаи «Шаҳри бехатар» амалӣ мегардад
Дар Тоҷикистон барои коҳиши хатари офатҳои табиӣ беш аз 19 миллион сомонӣ ҷудо гардид
Дар Тоҷикистон сатҳи нашъамандӣ коҳиш ёфтааст
Маркази робитаҳои ҷамъиятии Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон хабар медиҳад
НИШАСТИ МАТБУОТӢ. Дар Тоҷикистон мусодираи моддаҳои психотропии синтетикӣ зиёд гардидааст
Бо кормандони мақомоти корҳои дохилӣ дар вилояти Хатлон оид ба пешгирии омилҳои номатлуб вохӯрӣ доир шуд
Имангалӣ Тасмагамбетов: «Соли 2025 татбиқи Барномаи байнидавлатии мақсадноки СААД оид ба таҳкими сарҳади Тоҷикистону Афғонистон оғоз мешавад»
НИШАСТИ МАТБУОТӢ. Соли 2024 216 тоннаю 787 килограмм маводи пастсифат мусодира ва нобуд гардид
НИШАСТИ МАТБУОТӢ. Ҳодисаҳои нохуш аз бемасъулиятии кормандон ва норасоии мутахассисони соҳавӣ ба амал меоянд