Дар Тоҷикистон ҷамъоварии меваҳои ситрусӣ идома дорад
ДУШАНБЕ, 11.01.2025. /АМИТ «Ховар»/. Дар ҷумҳурӣ ҷамъоварии меваҳои ситрусӣ идома дорад. Ситруспарварон бояд меваҳои пухтаро аз дарахтон пурра ҷамъоварӣ намоянд. Агар меваҳоро пурра аз дарахт ҷамъоварӣ накунем, соли оянда ҳосили дилхоҳ ба даст намеорем. Чунин иброз намуд мудири шуъбаи зироаткории ситрусӣ-субтропикии Институти боғпарварӣ ва сабзавоткории Академияи миллии илмҳои кишоварзии Тоҷикистон Хайриддин Аминов ба АМИТ «Ховар».
«Агар меваҳои ситрусии пухта дар дарахт дуру дароз нигоҳ дошта шаванд, унсурҳои қувватдиҳандаи онҳо дар худи дарахт гардиш мекунанд ва гулҳои боқимондаи дарахт дигар ҳосил намедиҳанд. Инчунин ин ҳолат сабаби камчинии ҳосили соли оянда мегардад. Аз ин рӯ меваҳо бояд сари вақт ҷамъоварӣ гарданд ва моҳҳои феврал ва март дарахтони ситрусӣ ба шакл дароварда шуда, навдаҳои зиёдатияшон бояд бурида шавад»,- гуфт ҳамсуҳбати мо.
Хайриддин Аминов иброз намуд, ки меваҳои ситрусиро метавон дар сардхонаҳои махсус, ки ҳарораташон 8-10 дараҷа гарм аст, зиёда аз ду моҳ нигоҳ дошт.
Дар Ҷумҳурии Тоҷикистон соли 2024 боғҳои ситрусӣ 438 гектарро ташкил медоданд. Ин гуна боғҳо дар гармхонаҳо, хандақҳо ва нимхандақҳо бунёд шудаанд.
Ба андешаи мутахассиси соҳа, ба парвариши меваҳои растаниҳои ситрусӣ, хусусан дар хандақ аз солҳои 30-юми асри гузашта олимони Тоҷикистон асос гузошта буданд. Баъдан ин усули парвариши растаниҳои ситрусӣ дар дигар ҷумҳуриҳои Осиёи Марказӣ ривоҷ ёфт. Олимони тоҷик бунёдгузори усули дар хандақҳо парвариш кардани растаниҳои ситрусӣ дар Осиёи Марказӣ мебошанд. Инчунин минтақа, хок ва обу ҳавои Тоҷикистон нисбат ба дигар кишварҳои Осиёи Марказӣ барои парвариши меваҳои ситрусӣ созгор мебошад.
Дар Тоҷикистон водии Вахшу Ҳисор ва митақаҳои Кӯлоб, хусусан ноҳияҳои Фархор, Ҳамадонӣ ва Муъминобод барои парвариши меваҳои ситрусӣ мувофиқ мебошанд.
Ёдовар мешавем, ки дар доираи амалишавии «Барномаи рушди соҳаи боғу токпарварӣ ва ситруспарварӣ дар Ҷумҳурии Тоҷикистон барои солҳои 2025-2029» беш аз 113 гектар боғҳои ситрусӣ бунёд мегарданд. Бунёди ин боғҳо дар вилоятҳои Суғду Хатлон, Вилояти Мухтори Кӯҳистони Бадахшон ва шаҳру ноҳияҳои тобеи марказ ба нақша гирифта шудааст.
АКС аз манбаъҳои боз
Мудири кулли ФАО: «Дар самти истифодаи самараноки захираҳои табиии обу замин бояд оқилона муносибат кард»
Дар Конфронси ФАО дар Душанбе тағйирёбии иқлим, аз байн рафтани гуногунии биологӣ ва вайроншавии замин баррасӣ шуд
Иқтидори кишоварзию саноатии Тоҷикистон дар «Dushanbe EXPO Centre» ба маърази тамошо гузошта шуд
Жанна Исина: «Баргузории конфронси сатҳи баланд дар Душанбе мавқеи байналмилалии Тоҷикистонро тақвият медиҳад»
Дар доираи Конфронси 35-уми минтақавии Созмони озуқаворӣ ва кишоварзӣ ҷаласаи канорӣ оид ба татбиқи ҳуҷҷати «равиши ягонаи саломатӣ» баргузор шуд
Мудири кулли ФАО Тсюй Дунъюй: «Ба Президенти Тоҷикистон барои дар сатҳи баланд баргузор намудани Конфронси 35-уми минтақавии СММ изҳори миннатдорӣ менамоям»
Беш аз 8 миллиард доллар сармоягузорӣ: натиҷаҳои мулоқоти Пешвои миллат Эмомалӣ Раҳмон бо роҳбарони ширкатҳои Чин дар Пекин
Дар Душанбе модели ҳамкории минтақавӣ ва табодули дониш баррасӣ гардид
Тсюй Дунъюй ба муборизаи муштарак бо таҳдидҳои иқлимию иқтисодӣ даъват намуд
Агаси Арутюнян: «Конфронси 35-уми минтақавии ФАО барои муаррифии дастовардҳои Тоҷикистон ва иқтидори кишоварзии он имконияти васеъ фароҳам меорад»
Байни ширкатҳои Тоҷикистону Чин 28 санади ҳамкорӣ ба маблағи умумии 647 миллион доллари амрикоӣ ба имзо расид
Дар Душанбе Конфронси 35-уми минтақавии Созмони озуқаворӣ ва кишоварзии СММ ифтитоҳ гардид
