Дидбонгоҳҳои гумрукии Тоҷикистон бо технологияи муосири назорати гумрукӣ муҷаҳҳаз мегарданд

Сентябрь 19, 2019 15:50

ДУШАНБЕ, 19.09.2019/АМИТ «Ховар»/. Дар шаҳри Душанбе байни Хадамоти гумруки назди Ҳукумати  Ҷумҳурии Тоҷикистон ва қӯшунҳои сарҳадии Департаменти корҳои дохилии  Шоҳигарии Муттаҳидаи Британияи Кабир «Номаи ҳамкорӣ» ба имзо расид. Санади мазкурро Сардори Хадамоти гумруки назди Ҳукумати Ҷумҳурии Тоҷикистон Хуршед Каримзода ва аз ҷониби Британияи Кабир Сафири Шоҳигарии Муттаҳидаи Британияи Кабир ва Ирландияи Шимолӣ дар Ҷумҳурии Тоҷикистон Меттю Лоусон ба имзо расониданд. Дар ин хусус ба АМИТ «Ховар» аз Хадамоти гумруки назди Ҳукумати Ҷумҳурии Тоҷикистон иттилоъ доданд.

Тибқи хабари сарчашма, ҳамкорӣ дар ҳошияи «Номаи ҳамкорӣ»  имкон медиҳад, ки Хадамоти гумруки Тоҷикистон бо кумаки Иттиҳоди Муттаҳида дидбонгоҳҳои гумрукиро дар майдонҳои ҳавоӣ ва дидбонгоҳҳои гумрукии наздисарҳадии  Тоҷикистон бо техникаву технологияи муосири назорати гумрукии молу бағоҷ ва мусофирон муҷаҳҳаз гардонад.

Инчунин дар асоси санади мазкур мутахассисони Британияи Кабир барои баланд бардоштани иқтидори касбии кормандони мақомоти гумруки Тоҷикистон курсҳои омӯзишиву амалӣ ташкил намуда, таҷрибаи Британияро дар самти муборизаи муташаккилона бар зидди қочоқ ва дастрас намудани маълумоти пешакӣ оид ба мусофирон бо гумруки Тоҷикистон мубодила хоҳанд кард.

Мақомоти гумруки Тоҷикистон хабар медиҳад, ки дар доираи ба имзо расонидани санади ҳамкорӣ Сардори Хадамоти гумруки назди Ҳукумати Ҷумҳурии Тоҷикистон, генерал – майори хадамоти гумрук Хуршед Каримзода  бо  Сафири Шоҳигарии Муттаҳидаи Британияи Кабир ва Ирландияи Шимолӣ дар Ҷумҳурии Тоҷикистон Меттю Лоусон ва Котиби Давлатии қӯшунҳои сарҳадии Департаменти корҳои дохилии Шоҳигарии Муттаҳида мулоқот анҷом дод. Зимни он масъалаҳои марбут ба тақвияти ҳамкорӣ дар соҳаи гумрук баррасӣ гардиданд.

Дипломати бритонӣ Меттю Лоусон зикр кард, ки Британияи Кабир дар таҳкими ҳамкорӣ  бо Хадамоти гумруки Ҷумҳурии Тоҷикистон, хусусан дар самти таъмини бехатарии гузаргоҳҳои наздисарҳадӣ ҳавасманд аст.

Дар мулоқот ҳамзамон намояндаи қӯшунҳои сарҳадии Департаменти корҳои дохилии Шоҳигарии Муттаҳида Ник Фоулер доир ба фаъолияти  қӯшунҳои сарҳадии Департаменти корҳои дохилии Шоҳигарии Муттаҳида гуфт, ки аз лиҳози мавқеи ҷуғрофӣ Ҷумҳурии Тоҷикистон дар минтақаи ҳассос қарор дорад. Аз ин рӯ, ташкили Стратегияи муштараки махсус ва ҳамоҳанг сохтани он бо ҳамроҳии шарикони худ барои муқовимат ба таҳдидҳо ва дигар ҷиноятҳои дорои хусусияти фаромиллӣ яке аз масъалаҳои калидии  Британияи Кабир мебошад.

Сардори Хадамоти гумруки Тоҷикистон Хуршед Каримзода зикр намуд, ки дар минтақаи Осиёи Марказӣ Ҷумҳурии Тоҷикистон бо Ҷумҳурии Исломии Афғонистон аз ҳама сарҳади тӯлонитарин дорад, ки  1344 кмро ташкил медиҳад. Бо дахли фаъолияти мақомоти гумруки Тоҷикистон Хуршед Каримзода афзуд, ки  Тоҷикистон бо Қирғизистон 5 адад, Ӯзбекистон 17 адад,  Чин 1 адад ва бо Афғонистон 7 адад гузаргоҳҳои сарҳадии расмӣ дорад. Барои муҷаҳҳаз гардонидани онҳо бо техникаву технологияи муосир маблағҳои муайян ҷудо гардида, инчунин созмонҳои байналмилалӣ низ барои таъминоти онҳо кумак мерасонанд, аммо норасоиҳо дар ин самт ҷой доранд.

Зикр шуд, ки танҳо пурра муҷаҳҳаз намудани гузаргоҳҳои сарҳадӣ бо техникаи муосир, баланд бардоштани такмили ихтисоси кормандон ва истифода аз таҷрибаи кишварҳои пешрафта дар ин самт имконият медиҳад, ки пеши роҳи қочоқи маводи мухаддир ва яроқу аслиҳа самаранок гирифта шавад.

Сентябрь 19, 2019 15:50

Хабарҳои дигари ин бахш

РОҒУН — МИНТАҚАИ САЙЁҲӢ. Дар ин бора Қарори Ҳукумати Ҷумҳурии Тоҷикистон ба тасвиб расид
Ориф Амирзода: «Маҳз бар асари гармшавии иқлим беш аз 1000 пиряхи Тоҷикистон комилан об шудаанд»
БА ИСТИҚБОЛИ ҶАШНИ 35-СОЛАГИИ ИСТИҚЛОЛИЯТИ ДАВЛАТӢ. Дар ноҳияи Рашт 5 бунгоҳи тиббӣ мавриди истифода қарор гирифт
Имконияти сайёҳии Тоҷикистон дар ЭКСПО-и сайёҳии Ҷопон муаррифӣ мегардад
Ҷаласаи навбатии Шӯро оид ба муайян намудани сатҳи камбизоатӣ ва табақаи миёнаи аҳолӣ баргузор шуд
Дар Душанбе масъалаи ҳамкорӣ бо Маркази минтақавии рушди иқтидори Хазинаи Байналмилалии Асъор баррасӣ гардид
Дар ноҳияи Мурғоб иқтидори истеҳсоли энергияи офтобӣ зиёд мешавад
Дар Душанбе Созишнома оид ба маблағгузорӣ миёни Тоҷикистон ва Ассотсиатсияи Байналмилалии Рушд ба имзо расид
Раиси Шӯрои директорони ҶДММ «Ғаюр Гурӯҳ» Акбар Асадулло: «Имрӯз вақти дар амал собит кардани ватандӯстии мо расидааст»
Бартарафсозии оқибатҳои даргириҳои марзӣ дар деҳоти Чоркуҳ ва Сурхи Исфара таҳти таваҷҷуҳи хоссаи Пешвои миллат қарор дорад
ҲАМЛАИ ТАҶОВУЗКОРОНАИ ҚИРҒИЗИСТОН. Шералӣ Ризоён бар ин назар аст, ки фарзияи коршиноси қирғиз дар бораи лоиҳаи роҳи оҳани Чин-Қирғизистон-Узбекистон кирои танқид ҳам намекунад
Дар Душанбе ҷаласаи XXV Шӯрои байниҳукуматии ИДМ оид ба иктишоф, истифода ва ҳифзи қаъри замин оғоз ёфт