Пешвои миллат Эмомалӣ Раҳмон дар деҳоти Ҳайдар Усмонов бинои маркази хизматрасонии «Шоҳ»-ро ба истифода дода, бо 100 нафар ятими кул мулоқот намуданд

Ноябрь 13, 2022 11:52

ДУШАНБЕ, 13.11.2022 /АМИТ «Ховар»/. 13 ноябр дар идомаи сафари корӣ дар ноҳияи Бобоҷон Ғафуров Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар деҳоти Ҳайдар Усмонов бинои маркази хизматрасонии «Шоҳ»-ро ба истифода дода, бо 100 нафар ятими кул мулоқот намуданд.

Бинои хизматрасонӣ хуштарҳу замонавӣ буда, дар таҳхонаи он сардхона барои нигаҳдории 1000 тонна маҳсулоти кишоварзӣ ҷойгир аст.

Сардхонаи муосир бо дастгоҳу таҷҳизоти зарурӣ муҷаҳҳаз гардида, он чор анбори васеъ дорад, ки барои нигоҳ доштани меваю сабзавот ва полезӣ пешбинӣ шудааст.

Иншооти хизматрасонӣ дар раванди созандагию бунёдкориҳо ба истиқболи сазовори ҷашни 31-солагии Истиқлоли давлатии Ҷумҳурии Тоҷикистон аз тарафи соҳибкори ватанӣ сохта шуда, барои 15 сокини маҳаллӣ ҷои нави корӣ таъсис ёфт.

Толори баргузории маросимҳо бесутуни барҳаво буда, 150 ҷои нишаст дорад. Сақфи толори мазкур бо санъати баланди меъмории миллӣ гаҷкорӣ карда шудааст, ки зебою диққатҷалбкунанда мебошад. Ҳамчунин дар маркази хизматрасонӣ ҳуҷраҳои алоҳида барои омода кардани таъомҳои миллию аврупоӣ ва хуришҳо мавҷуд аст.

Минбаъд сокинони деҳоти мазкур имкон доранд, ки бо истифода аз хизматрасониҳои дастраси марказ ҷашну маросимҳои гуногунро баргузор намоянд. Аз қомат афрохтани боз як бинои хуштарҳи хизматрасонӣ ба ин гӯшаи ноҳияи Бобоҷон Ғафуров зебоии дигар зам гардид.

Дар ҳамин ҷо Пешвои миллат муҳтарам Эмомалӣ Раҳмон бо ятимони кул, ки бо амри тақдир аз навозиши волидайн бенасиб мондаанд, вохӯрӣ намуда, бо оростани дастархони идона ба онҳо тӯҳфаҳои арзишманд тақдим карданд.

Ятимон бо шодию нишот аз дасти Сарвари раъийятпарвару инсондӯсти мамлакат либоси мактабӣ, пойафзол, шириниҳо ва кӯмаки молӣ туҳфа гирифтанд.

Президенти Ҷумҳурии Тоҷикистон муҳтарам Эмомалӣ Раҳмон бо наврасону ҷавонони ятим, ки 46 нафар аз ноҳияи Бобоҷон Ғафуров ва 54 каси дигар аз шаҳри Гулистони вилояти Суғд мебошанд, суҳбати самимӣ ороста, онҳоро барои таҳсили хубу аъло, касбу ҳанаромӯзӣ, аз худ кардани забонҳои хориҷӣ, аз ҷумла русӣ ва англисӣ ва кор бо технологияи ҳозиразамон ҳидоят намуданд.
Ифтитоҳи маркази хизматрасонӣ ва мулоқот бо ятимони кул дар ноҳияи Бобоҷон Ғафуров 13.11.2022

Ноябрь 13, 2022 11:52

Хабарҳои дигари ин бахш

БАХШИДА БА 35-СОЛАГИИ ИСТИҚЛОЛИ ДАВЛАТӢ. Дар иншооти ҷашнии вилояти Суғд корҳои сохтмонӣ бомаром идома доранд
Қарорҳои Ҳукумати Ҷумҳурии Тоҷикистон
Фармонҳои Президенти Ҷумҳурии Тоҷикистон
Имрӯз маҷлиси Ҳукумати Ҷумҳурии Тоҷикистон баргузор гардид
35-СОЛАГИИ ИСТИҚЛОЛИ ДАВЛАТӢ. Бахшида ба ин ҷашн дар Ҳисор сохтмони бинои бисёрқабатаи истиқоматӣ оғоз ёфт
Бори аввал дар Тоҷикистон ба парвариши моҳии навъи «бестер» хоҷагии «Моҳипарварии Каёнуш»-и ноҳияи Данғара шуруъ менамояд
НОЗИРОНИ НАВРАСИ ҲАРАКАТ ДАР РОҲ. Суратгузориши АМИТ «Ховар» аз ҷараёни оғози озмун
Президенти Ҷумҳурии Тоҷикистон Эмомалӣ Раҳмон ба Президенти Ҷумҳурии Туркия Реҷеп Тайип Эрдоган барқияи шодбошӣ ирсол намуданд
Дар Ҷамоати деҳоти 10-солагии Истиқлолияти шаҳри Турсунзода 8 километр роҳи мошингард ба истифода дода шуд
Сарвари давлат Эмомалӣ Раҳмон дар ноҳияи Шаҳритус дидбонгоҳҳои нави сарҳадиро ифтитоҳ карда, дар чорабинии идона ба муносибати 29-умин солгарди таъсиси Қӯшунҳои сарҳадии КДАМ иштирок намуданд
Пешвои миллат Эмомалӣ Раҳмон дар ҷамъомади тантанавӣ ба муносибати Рӯзи сарҳадбонон иштирок намуданд
Суханронии Президенти Ҷумҳурии Тоҷикистон, Пешвои миллат, Сарфармондеҳи Олии Қувваҳои Мусаллаҳ муҳтарам Эмомалӣ Раҳмон ба муносибати Рӯзи сарҳадбонон