«Тоҷик Эйр» парвозҳоро дар масири Душанбе-Хоруғ-Душанбе оғоз менамояд

Сентябрь 27, 2024 15:05

ДУШАНБЕ, 27.09.2024 /АМИТ «Ховар»/. Ширкати ҳавопаймоии ватании «Тоҷик Эйр» шуруъ аз 30 сентябри соли 2024 парвозҳоро дар масири Душанбе-Хоруғ-Душанбе оғоз менамояд.

Парвозҳои ҳавоӣ дар масири Душанбе-Хоруғ-Душанбе дар асоси дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон ва мусоидати Агентии авиатсияи граждании назди Ҳукумати Ҷумҳурии Тоҷикистон барқарор карда шуданд.

Директори генералии ширкати ҳавопаймоии «Тоҷик Эйр» Парвиз Шодмонзода дар суҳбат ба хабарнигори АМИТ «Ховар» иттилоъ дод, парвозҳо дар масири Душанбе-Хоруғ-Душанбе ҳафтае се маротиба: рӯзҳои душанбе, чоршанбе ва шанбе тавассути ҳавопаймои АН-28 анҷом дода мешаванд. Нархи чипта дар масири Душанбе-Хоруғ-Душанбе дар як самт 900 сомонӣ буда, шаҳрвандон имкон доранд чиптаҳои парвозро аз нуқтаҳои фурӯши чиптаҳои «Тоҷик Эйр», ки дар бинои ширкати ҳавопаймоии «Тоҷик Эйр», дар кӯчаи Мирзо Мастонгулов 32/1 воқеъ аст, дастрас намоянд. Масофаи парвоз аз Душанбе ба Хоруғ 1 соату 10 дақиқаро ташкил медиҳад.

Ҳавопаймои АН-28, ки қаблан дар ин масир парвоз мекард, аз ду муҳаррик иборат буда, ғунҷоиши 17 мусофирро дорад. Он баъди таъмири куллӣ ва тамдид гардидани муҳлати истифодааш парвозҳоро дар самти Душанбе-Хоруғ-Душанбе идома медиҳад.

Ҳавопаймои АН-28, ки дар хатсайри Душанбе-Хоруғ-Душанбе аз 30 сентябр ба парвоз оғоз мекунад, ба талаботи бехатарии авиатсионӣ ҷавобгӯ ва мутобиқ мебошад.

26 сентябр ҳавопаймои АН-28 дар фазои Душанбе парвози санҷишии муваффақона анҷом дод. Парвоз аз Душанбе ба Хоруғ соати 8:00 субҳ доир шуда, вақти парвоз 1 соату 10 дақиқаро ташкил медиҳад. Чун Бадахшон минтақаи баландкӯҳ мебошад, парвоз дар ин масир ба вазъи боду ҳаво сахт вобаста аст.

Назар ба иттилои фармондеҳи ҳавопаймои АН-28 Шукрихудо Додихудоев, парвоз дар хатсайри Душанбе-Хоруғ-Душанбе душвортарин роҳи ҳавоӣ арзёбӣ мегардад.

Алоқаи ҳавоӣ байни Душанбе ва Хоруғ аз моҳи сентябри соли 2021 қатъ шуда буд. То он дам парвозҳо ба Хоруғ тариқи ягона ҳавопаймои АН-28, ки бо иҷозатномаи парвоз дар ихтиёри «Тоҷик Эйр» қарор дошт, анҷом дода мешуд.


Ҳоло шаҳрвандон ва сайёҳон ба Бадахшон тавассути роҳи мошингард сафар менамоянд, ки 16-17 соат вақтро мегирад. Бо барқарор гардидани роҳи ҳавоӣ дар хатсайри Душанбе-Хоруғ-Душанбе мушкили мусофироне, ки нияти ба Бадахшон сафар кардан доранд, осон мегардад. Яъне онҳо имкон доранд соати 08:00 аз Душанбе ба Хоруғ парвоз намуда, соати 10:00 ба Душанбе баргарданд. Вақти рафту омад ҳамагӣ 2 соату 20 дақиқаро ташкил медиҳад.

Директори генералии ширкати ҳавопаймоии «Тоҷик Эйр» Парвиз Шодмонзода иттилоъ дод, ки ширкат дар оянда тасмим гирифтааст, ки парвозҳои маҳаллиро дар масири Душанбе-Панҷакент, Душанбе-Рашт, Душанбе-Лахш, Душанбе-Кӯлоб, Душанбе-Ишкошим, Душанбе-Ванҷ, Душанбе-Рӯшон ва Душанбе-Айнӣ, ки қаблан анҷом дода мешуданд, бо истифода аз имконияти мавҷуда барқарор намояд.

Марзия САИДЗОДА,
АМИТ «Ховар»

АКС: АМИТ «Ховар»/«Тоҷик-Эйр»

Сентябрь 27, 2024 15:05

Хабарҳои дигари ин бахш

Дастовардҳои Тоҷикистон дар соҳаи инфрасохтори роҳу нақлиёт дар конфронси ҷаҳонии GICC муаррифӣ шуданд
Дар Қазоқистон Намоишгоҳи маҳсулоти кишоварзӣ, саноатӣ, ҳунарҳои мардумӣ ва таомҳои миллии Хатлон доир мегардад
Симпозиуми байналмилалии илмию амалӣ оид ба гӯсфанди ҳисорӣ баргузор мешавад
Тавсеаи ҳамкории Тоҷикистон бо Швейтсария дар доираи лоиҳаи «Blue Peace Central Asia» баррасӣ шуд
Дар Душанбе ҷаласаи 18-уми Комиссияи байниҳукуматии Тоҷикистону Беларус доир мегардад
Таҳкими робитаҳои дуҷонибаи Тоҷикистон ва Ҷопон дар бахшҳои иқтисодӣ баррасӣ шуд
Масоили омодагӣ ва иштироки Корея дар Форуми байналмилалии сармоягузории «Dushanbe Invest – 2025» баррасӣ шуд
Резервати биосферии «Ромит» ба Феҳристи шабакаи ҷаҳонии резерватҳои биосферии ЮНЕСКО ворид карда мешавад
Хуршед Мирзо дар форуми БРИКС дар Чин омодагии Тоҷикистонро барои ҳамкории рақамӣ ва саноатӣ баён намуд
ФОРУМИ БАЙНАЛМИЛАЛИИ САРМОЯГУЗОРӢ ДАР СОҲАИ САЙЁҲӢ. Дар Душанбе имконияти нави сармоягузорӣ ба соҳаи сайёҳӣ баррасӣ шуд
«Харитаи роҳ ба самти бетарафии карбон барои Осиёи Марказӣ» дар Токио баррасӣ шуд
Кумитаи ҳифзи муҳити зист «Стратегияи миллии идоракунии партовҳо барои давраи то соли 2035»-ро таҳия менамояд